"ކީރިތި ޤުރްއާނަކީ އިންސާނިއްޔަތަށް ރަޙްމަތެއް ކަމުގައި ﷲ ބާވައިލެއްވެވި އެކަލާނގެ ފޮތެވެ. ތަޢުލީމީ އެންމެހައި މަރުޙަލާތަކުގައި ޤުރްއާން ވަކިމާއްދާއެއްގެ ގޮތުގައި ކިޔަވައިދިނުމަކީ މުހިންމު ކަމެކެވެ. މިކަމަކީ އިޚްތިޔާރީ ކަމެއްގެ ގޮތުގައި ދޫކޮށްލެވިގެންވާނެ ކަމެއް ނޫނެވެ."
--ޑރ. މުޙައްމަދު ޝަހީމް ޢަލީ ސަޢީދު
ދިވެހިން އިސްލާމް ދިނާއި ދުރަށް ގެންދިއުމަށް ދުރާލައި ރާވައިގެން ކުރަމުން ގެންދާ މަސައްކަތްތަކުގެ ތެރެއިން ކީރިތި ޤުރްއާން އުނގެނުމަކީ އިޚްތިޔާރީ ކަމެއް ކަމުގައި ހަދަން މަސައްކަތްކުރާ ކަމަށް ޤަބޫލުކޮށް ގިނަ ބައަކު މިހާރު އަންނަނީ އެކަމާއި ދެކޮޅަށް މަސައްކަތް ކުރަމުންނެވެ.
މިކަމާއިބެހޭ ސިއްރު ބައްދަލުވުންތަކެއް ރޭ ވެސް ބޭއްވި ކަމުގެ މައުލޫމާތު ބައެއް ފަރާތްތަކުން ގެންދަނީ ހާމަކުރަމުންނެވެ.
މިކަމާއި ގުޅިގެން ޑރ. މުޙައްމަދު އިޔާޟް ވެސް އިއްޔެ ވަނީ ކަންބޮޑުވުން ފައުޅުކުރައްވައިފައެވެ.
"ޤުރްއާނަކީ މުސްލިމުންގެ ދުސްތޫރްއެވެ. ވީމާ ތައުލީމީ ހުރިހާ މަރުހަލާއެއްގައި ޤްރްއާން ކިޔެވުން އަދި ކިޔަވައިދިނުން އޮންނަން ޖެހެއެވެ! އެއީ ބޭނުންވެއްޖެ ނަމަ ދޫކޮށްލެވޭ މާއްދާއެއްގެ ގޮތުގައި ހެދިގެން ނުވާނެއެވެ." –ޑރ. މުޙައްމަދު އިޔާޟް ޢަބްދުއްލަޠީފް
