މުސްލިމް މުޖުތަމައުތަކަށް ބަލައިފިނަމަ މިއަދުގެ އެންމެ ބޮޑު އެއް މައްސަލައަކީ މި ފަދަ އާޔަތްތައް ކީރިތި ޤުރްއާނުގައި އޮތްކަން ނުއެނގުމެވެ. ނުވަތަ ހަނދާން ނެތުމެވެ.
ﷲ ތަޢާލާ އިންސާނުންނަށް އިޚްތިޔާރުތަކެއް ދެއްވަވާފައިވަނީ މުހިންމު މަޤްޞަދުތަކަކަށްޓަކައެވެ. އޭނާ އިމްތިޙާން ކުރެއްވެވުމަށެވެ. ނަމަވެސް ބާރެއް ލިބުމުން ނުވަތަ ބާރުވެރިކަމެއް ލިބުމުން އެކަން ހަނދާނަކު ނުހުރެއެވެ. ތިމާ ކުރާ ކޮންމެ ޢަމަލެއްވެސް ﷲ ތަޢާލާ ބައްލަވައިވޮޑިގެންވާ ކަމާއި މަލާއިކަތުން ލިޔުވަވަމުން ގެންދަވާކަން ހަނދާނަށް ނުވެސް އަންނަ ފަދައެވެ.
"ހަމަކަށަވަރުން، ﷲ ދެކެވޮޑިގެންވާކަން އޭނާ ނުދަންނަނީ ހެއްޔެވެ؟" (އަލް ޢަލަޤް: 14) މިފަދަ ޢާޔަތްތައް މަތިން ގިނަގިނައިން ހަނދާންކުރާށެވެ!
ޢާއިލީ ޙައިޞިއްޔަތުން ނަމަވެސް އަދި މުޖުތަމައުގެ ހައިސިއްޔަތުން ނަމަވެސް އެއްވެސް މީހަކަށް އެއްވެސް ބާރެއް ދެއްވަވައިފިނަމަ އެއީ ފަޚުރުވެރިކަމެއް ކަމަށް ދެކެ ބޮޑާވެ ނުގަންނާށެވެ! ﷲ ތަޢާލާ ދެއްވެވި ނިޢްމަތެއް ކަމާއި ހަވާލުކުރެއްވެވި މަސްއޫލިއްޔަތެއް ކަމަށް ދެކެ ﷲ ތަޢާލާއަށް ބިރުވެތިވާށެވެ!
ނިޢްމަތަށް ޝުކުރުވެރިވުމަކީ އެއީއެވެ. ނިޢްމަތް ތިމާ އާއިއެކުގައިވުމަށް އެދޭ މީހާ ޝުކުރުވެރިވުން ގިނަކުރާށެވެ. ޝުކުރުވެރިވުމަކީ ނިޢްމަތް ދެއްވެވި ﷲ ތަޢާލާ ރުހިވޮޑި ނުގަންނަވާނެ ގޮތަކަށް ހަމަ އެއްވެސް ކަމެއް ނުކުރުމެވެ. ފުރިހަމައަށް ކިޔަމަންތެރިކަން އަދާކުރުންމަތީގައި ދެމިހުރުމެވެ.
- އިސްލާމީ ތިލަފަތުގެ ދަރުސަކުން
