ކ. ދިއުފުށީގައި މިއަދު މިނިސްޓަރ މުޙައްމަދު އަސްލަމް ދެއްކެވި ވާހަކަފުޅުގައި "މީހަކު މެސެޖުކޮށް 1 ލައްކަ ޑޮލަރުގެ ރިޝްވަތުގެ ފައިސާ ހުށަހެޅި" ކަމަށް ވިދާޅުވި ޚަބަރު މިއަދުނޫހުގައި ޝާއިޢުކުރުމުން ބައެއް ކިޔުން ތެރިން ބުނެފައިވަނީ "ރިޝްވަތު ހުށަހެޅި މީހާގެ މައްސަލަ އެސީސީއަށް ހުށަހެޅުއްވިކަން" އެނގެން ބޭނުންވާ ކަމަށެވެ.
ރިޝްވަތުގެ ޤާނޫނަށް ބަލާއިރު ރިޝްވަތު ހުށަހެޅުމަކީވެސް ކުށެކެވެ.
ކިޔުންތެރިން ބުނެފައިވަނީ ރާއްޖޭގައި ޢާންމުވެފައިވާ ކޮރަޕްޝަނުގެ އަމަލުތައް ހުއްޓުވޭނީ އެކަމާއި ގުޅުންހުރި އެންމެންގެ މައްޗަށް ވެސް ފިޔަވަޅު އަޅައިގެން ކަމަށެވެ. އެހެންކަމުން މިނިސްޓަރ އަސްލަމަށް ނަމަވެސް އެހެން މީހަކަށް ނަމަވެސް ރިޝްވަތު ހުށަހަޅައިފިނަމަ ހަމައެކަނި "ރަތަށް އެރުމުން" ނުނިމޭނެ ކަމަށެވެ.
މިނިސްޓަރ އަސްލަމް މިއަދު ވިދާޅުވީ ފެނާއި ނަރުދަމާގެ މަޝްރޫޢެއް އަވަސްކޮށް ދިނުމަށް އެދި މީހަކު ކުރި މެސެޖުގައި "1 ލައްކަ ޑޮލަރު އަސްލަމަށް" ކަމަށް ބުނެފައިވާ ކަމަށެވެ. އަދި މިކަމުން އެނގިވަޑައިގަތީ ފާއިތުވި އަހަރުތަކުގައި މިބާވަތުގެ ކަންކަމުގައި ކޮރަޕްޝަންގެ އަމަލުތައް އިތުރުވެފައިވާ މިންވަރު ކަމަށެވެ.
ރައީސް އިބްރާހީމް މުޙައްމަދު ޞާލިޙް މިއަދުވެސް ވަނީ ސަރުކާރުގެ ތެރެއިން ހިންގަމުން ގެންދާ ކޮރަޕްޝަނުގެ އަމަލުތައް ހުއްޓުވާނެ ކަމުގެ ޔަޤީންކަން ދެއްވައިފައެވެ.
