މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ (އެމް.އޯ.ސީ.ސީ.އީ.އީ) އާއި ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ) އާ ދެމެދު ތިމާވެށި ހިމާޔަތްކުރުމުގެ މުހިންމު މަޝްރޫޢުތަކެއް ކުރިއަށް ގެންދިއުމަށްޓަކައި އެއްބަސްވުމުގެ ލިޔުންތަކުގައި (ލެޓާސް އޮފް އެގްރީމަންޓް) މިއަދު ސޮއިކޮށްފިއެވެ.
މި އެއްބަސްވުމުގެ ދަށުން ކުރިއަށް ގެންދިއުމަށް ހަމަޖެހިފައިވަނީ ގްލޯބަލް އެންވަޔަރަންމަންޓް ފެސިލިޓީ (ޖީ.އީ.އެފް) ގެ އެހީގައި ހިންގުމަށް ހަމަޖެހިފައިވާ މަޝްރޫޢުތަކެކެވެ. މީގެ މައިގަނޑު ބޭނުމަކީ ރާއްޖޭގެ ދިރުންތަކުގެ ނަސްލުތައް ހިމާޔަތްކުރުމާއި ތިމާވެށި ރައްކާތެރިކުރުމުގެ ޤައުމީ ސިޔާސަތުތައް އިތުރަށް ހަރުދަނާކޮށް ކުރިއެރުވުމެވެ.
މި މަޝްރޫޢުގެ ދަށުން މައިގަނޑު ގޮތެއްގައި ކުރުމަށް ހަމަޖެހިފައިވާ ކަންކަމުގެ ތެރޭގައި ރާއްޖޭގެ 'ނެޝަނަލް ބަޔޯޑައިވަރސިޓީ ސްޓްރެޓެޖީ އެންޑް އެކްޝަން ޕްލޭން' މުރާޖަޢާކޮށް، ޒަމާނާ އެއްގޮތަށް އަދާހަމަކުރުން ހިމެނެއެވެ. މީގެ އިތުރުން ކޮންވެންޝަން އޮން ބަޔޮލޮޖިކަލް ޑައިވަރސިޓީ (ސީ.ބީ.ޑީ) އަށް ރާއްޖެއިން ހުށަހަޅަންޖެހޭ 7 ވަނަ ޤައުމީ ރިޕޯޓު ތައްޔާރުކުރުމުގެ މަސައްކަތް ވެސް މި މަޝްރޫޢުގެ ތެރެއިން ކުރިއަށްދާނެއެވެ.
ހަމައެއާއެކު، ތިމާވެށީގެ ދިރުންތައް ހިމާޔަތްކުރުމަށް ބޭނުންވާ މާލީ ވަސީލަތްތައް ހޯދުމާއި ދެމެހެއްޓެނިވި ގޮތެއްގައި އެކަންކަން ކުރިއަށް ގެންދިއުމަށްޓަކައި 'ބަޔޯޑައިވަރސިޓީ ފައިނޭންސިންގ ޕްލޭން' އެކުލަވާލުމަށް ވެސް ވަނީ ހަމަޖެހިފައެވެ.
މި އެއްބަސްވުމަކީ ރާއްޖޭގެ ނާޒުކު ތިމާވެށި ރައްކާތެރިކޮށް، ދުނިޔޭގެ ފެންވަރުގައި ތިމާވެއްޓަށް ގެންނަންޖެހޭ ހެޔޮ ބަދަލުތަކަށް އެއްބާރުލުން ދިނުމުގެ ގޮތުން ދިވެހި ސަރުކާރުން ކުރަމުންދާ މަސައްކަތްތަކަށް ލިބިގެންދިޔަ މުހިންމު ކުރިއެރުމެކެވެ.
