މާލެ ސަރަޙައްދުގައި ސިއްޙީ ދާއިރާއިން ބޮޑެތި މަޝްރޫޢުތަކެއް ކުރިއަށް ގެންދެވުމަށް ނިންމަވައި، އެ މަޝްރޫޢުތަކުގެ ތަފްސީލު ސިއްޙަތާއި، އާއިލާއާއި އިޖުތިމާއީ އެހީއާ ބެހޭ ވަޒީރު ޤީލާ ޢަލީ ހިއްސާކުރައްވައިފިއެވެ. ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ވަނީ މާލެ، ވިލިމާލެ އަދި ހުޅުމާލެ ހިމެނޭހެން ތަރައްޤީކުރުމަށް ހަމަޖެހިފައިވާ މުހިންމު ސިއްޙީ ވަސީލަތްތަކުގެ ތަފްސީލު ދެއްވާފައެވެ.
އެގޮތުން، ޗައިނާ ސަރުކާރުގެ ހިލޭ އެހީތެރިކަމާއެކު ވިލިމާލޭގައި 100 އެނދުގެ ޓާރޝަރީ ހޮސްޕިޓަލެއް ތަރައްޤީކުރުމަށް ވަނީ ނިންމާފައެވެ. އަދި ހުޅުމާލެ ދެވަނަ ފިޔަވަހީގައި ކެންސަރު ބަލި ދެނެގަތުމަށް ޚާއްޞަ "ޑައިގްނޯސްޓިކް ސެންޓަރ ފޯ އޮންކޮލޮޖީ ސަރވިސަސް" ތަރައްޤީކުރުމުގެ އެއްބަސްވުމުގައި ކުރިއަށް އޮތް ދެ ހަފުތާގެ ތެރޭގައި ސޮއިކުރެވޭނެކަމަށް ވަޒީރު ވިދާޅުވިއެވެ.
މީގެއިތުރުން، ހުޅުމާލެ ދެވަނަ ފިޔަވަހީގައި 500 އެނދުގެ މަލްޓި-ސްޕެޝަލިޓީ ހޮސްޕިޓަލެއްގެ ޢަމަލީ މަސައްކަތް ކުރިއަށް ގެންދާނެ އެންމެ އެކަށޭނަ ގޮތްތަކާ މެދު މަޝްވަރާކުރެވެމުންދާއިރު، ހުޅުމާލެ ފުރަތަމަ ފިޔަވަހީގައި 250 އެނދުގެ މަލްޓި-ސްޕެޝަލިޓީ ހޮސްޕިޓަލެއް ތަރައްޤީކުރުމަށް ބޭނުންވާ ފަންނީ މަޝްވަރާތައްވެސް ދަނީ ހިނގަމުންނެވެ.
ވަޒީރު ޤީލާ އިތުރަށް ފާހަގަކުރެއްވި ގޮތުގައި، ބޭންކް އޮފް މޯލްޑިވްސް (ބީއެމްއެލް)ގެ ފައިނޭންސްގެ ދަށުން "ނޭޝަނަލް ޑިސެބިލިޓީ ސަރވިސަސް އެންޑް ތެރަޕީ ސެންޓަރ" ތަރައްޤީކުރުމުގެ މަސައްކަތް މިހާރު ވަރަށް ބާރަށް ދަނީ ކުރިއަށެވެ. އަދި ހުޅުމާލެ ދެވަނަ ފިޔަވަހީގައި ތެލެސީމިއާ އަދި ލޭގެ ބަލިތަކަށް ޚާއްޞަ 100 އެނދުގެ "ތެލެސީމިއާ އެންޑް ހެމަޓޮލޮޖީ ހޮސްޕިޓަލް" ޤާއިމުކުރުމުގެ މަޝްވަރާތައްވެސް ކުރިއަށްދާކަން ވަޒީރު ހާމަކުރެއްވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވުރާ އެއްގޮތަށް މި މަޝްރޫޢުތައް ނިމި ޚިދުމަތް ދޭން ފެށުމުން، ރާއްޖޭގެ ޞިއްޙީ ނިޒާމަށް އިންޤިލާބީ ބޮޑު ބަދަލެއް އަންނާނެއެވެ. މީގެ ސަބަބުން ބޮޑެތި ބަލިތަކަށް ފަރުވާ ހޯދުމަށް ރާއްޖެއިން ބޭރަށް ދާންޖެހޭ ދިއުން ނިމުމަކަށް އައިސް، އަމިއްލަ ޤައުމުގައި ތިބެގެން ބައިނަލްއަޤްވާމީ ފެންވަރުގެ ޒަމާނީ ސިއްޙީ ފަރުވާ ލިބޭނެއެވެ. އަދި މީގެ ނަތީޖާއެއްގެ ގޮތުން، ބޭސްފަރުވާއަށް ރައްޔިތުންނާއި ދައުލަތުން ކުރަންޖެހޭ ބޮޑެތި ޚަރަދުތައް ސަލާމަތްވެ، އެތައް ޢާއިލާއަކަށް މާލީ އަދި ނަފްސާނީ ގޮތުން ބޮޑު ލުޔަކާއި ހިތްހަމަޖެހުމެއް ލިބިގެންދާނެއެވެ.
