އައްޑޫ ސިޓީގައި ކަރަންޓުގެ ޚިދުމަތް ރަސްމީކޮށް ފެށުމުގެ ތައްޔާރީތަކުގެ ތެރެއިން، އައްޑޫ ސިޓީ ހިތަދޫގައި މިއަދު ވަނީ ޚާއްޞަ ދިދަ ނެގުމުގެ ރަސްމިއްޔާތެއް ބާއްވާފައެވެ.
މި ރަސްމިއްޔާތުގައި ޤައުމީ ދިދަ ނަންގަވައިދެއްވީ ސްޓޭޓް އިލެކްޓްރިކް ކޮމްޕެނީ (ސްޓެލްކޯ)ގެ މެނޭޖިންގ ޑިރެކްޓަރ ޑރ. ޢަލީ އަޒުވަރު އެވެ. އަދި ސްޓެލްކޯގެ ދިދަ ނަންގަވައިދެއްވީ އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރ ޢާއިޝަތު މުޒްނާ އެވެ.
ރަސްމިއްޔާތުގައި ވާހަކަފުޅު ދައްކަވަމުން މެނޭޖިންގ ޑިރެކްޓަރ ޑރ. ޢަލީ އަޒުވަރު ވަނީ މީގެ 17 އަހަރު ކުރިން ސްޓެލްކޯއިން އައްޑޫ ސިޓީގައި ކަރަންޓުގެ ޚިދުމަތް ދެމުން އައިކަން ފާހަގަކުރައްވާފައެވެ.
އަދި އައްޑޫ ސިޓީގެ ކަރަންޓުގެ ޚިދުމަތް އަލުން އަނބުރާ ސްޓެލްކޯއާ ޙަވާލުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ނިންމެވުމަކީ، އައްޑޫގެ ރައްޔިތުންނަށް އިތުބާރުހުރި އަދި ދެމެހެއްޓެނިވި ޚިދުމަތެއް ކަށަވަރުކޮށްދެއްވުމަށްޓަކައި އެޅުއްވި މުހިންމު ފިޔަވަޅެއްކަމަށްވެސް ޑރ. އަޒުވަރު ވިދާޅުވިއެވެ.
