މިދިޔަ އޮގަސްޓު މަހު ޒަކާތު ފަންޑުން އެންމެ ބޮޑު މާލީ އެހީތެރިކަމެއް ފޯރުކޮށްދީފައިވަނީ ފަޤީރުންނާއި މިސްކީނުންގެ ބަޔަށް ކަމަށް މޯލްޑިވްސް ޒަކާތު ހައުސްއިން ހާމަކުރައްވައިފިއެވެ.
ޒަކާތު ހައުސްއިން އާންމުކޮށްފައިވާ ތަފާސްހިސާބުތަކަށް ބަލާއިރު، އޮގަސްޓު މަހު އެކި ކަންކަމަށް މާލީ އެހީތެރިކަން ފޯރުކޮށްދިނުމަށް މުޅި ޖުމުލަ 5,170,675 (ފަސް މިލިއަން އެކުއެންބައި ލައްކަ) ރުފިޔާ ދޫކޮށްފައިވެއެވެ. މިއީ ވޭތުވެދިޔަ އަހަރުގެ އޮގަސްޓު މަހު ދޫކުރި 4,615,944 ރުފިޔާއާ އަޅާބަލާއިރު ಶޭކަޑައިގެން 12 އިންސައްތައިގެ އިތުރުވުމެކެވެ.
ޒަކާތު ފަންޑުން އެންމެ ބޮޑު ހޭދައެއް ކުރެވުނު ފަޤީރުންނާއި މިސްކީނުންގެ ބަޔަށް މުޅި ޖުމްލަ 2,358,675 ރުފިޔާ ދޫކޮށްފައިވެއެވެ. މީގެ ތެރޭގައި ބޭސްފަރުވާގެ އެހީގެ ގޮތުގައި ދޫކުރި 2,316,175 ރުފިޔާއާއި، އާންމު ޒަރޫރީ ބޭނުންތަކަށް ދޫކުރި 42,500 ރުފިޔާ ހިމެނެއެވެ.
ދެން އެންމެ ބޮޑު ހޭދައެއް ކޮށްފައިވަނީ ފީސަބީލިﷲގެ ބަޔަށެވެ. އެ ބަޔަށް މުޅި ޖުމުލަ 2,544,823 ރުފިޔާ ދޫކޮށްފައިވާއިރު، އޭގެ ތެރޭގައި ދީނީ ޕްރޮގްރާމްތައް ހިންގުމަށް 1,047,219 ރުފިޔާއާއި، މަތީ ތަޢުލީމަށް އެހީގެ ގޮތުގައި 797,604 ރުފިޔާ، ފޮތްތައް ތަރުޖަމާކުރުމަށް 579,585 ރުފިޔާގެ އިތުރުން ހިފްޒު ޕްރޮގްރާމުތަކާއި ކީރިތި ޤުރްއާނުގެ ޢިލްމު ފެތުރުމަށް 120,414 ރުފިޔާ ހޭދަކޮށްފައިވެއެވެ.
މީގެ އިތުރުން، ދަރަނިވެރިންނަށް އެހީވުމުގެ ބައިން (އަލްޣާރިމީން) 60,061 ރުފިޔާ އަދި ހާލުގައި ޖެހިފައިވާ ދަތުރުވެރިންގެ ބައިން (އިބްނުއްސަބީލް) 19,834.02 ރުފިޔާ ވަނީ ދޫކޮށްފައެވެ.
މިދިޔަ އޮގަސްޓު މަހުގެ ތެރޭގައި ޒަކާތު ފަންޑަށް އާމްދަނީގެ ގޮތުގައި 7,353,416.98 ރުފިޔާ ލިބިފައިވާކަމަށްވެސް ޒަކާތު ހައުސްއިން މައުލޫމާތު ދެއްވައެވެ. މި ތަފާސްހިސާބުތަކަކީ މާލީ ކަންކަމާއި ސަރުކާރު ކުންފުނިތަކާއި ބެހޭ ވުޒާރާގެ، އެސްއޭޕީ (SAP) ސިސްޓަމްގައިވާ ރެކޯޑުތަކަށް ބަލައިގެން އެކުލަވާލާފައިވާ ތަފާސްހިސާބުތަކެކެވެ.
