މަތީ ތަޢުލީމުގެ ފަންނުގައި ޚިޔާރުކުރާ ދާއިރާއެއްގެ އެންމެ އުހަށް ދިޔުމުގެ ޢަޒުމް ކޮންމެ ކުއްޖެއްގެ ކިބައިގައިވެސް އޮންނަންވާނެކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ވަޒީރު މިހެން ވިދާޅުވީ ވިލާ ކޮލެޖުގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
ރާއްޖެއަކީ ބިން މަދު، ޖޯގްރަފީގެ ގޮތުން ކުޑަ ޤައުމެއް ނަމަވެސް، މިހާރު މިއީ ކިޔަވައިގެން ތިބި ޢިލްމުވެރި ދަރިންތަކެއް ހިކުމަތްތެރިކަމާއެކު އުފައްދަމުންދާ ޤައުމެއްކަން ވަޒީރު ފާހަގަކުރެއްވިއެވެ. އެގޮތުން 2040 ވަނަ އަހަރާ ހަމައަށް ދާއިރު ރާއްޖެއަކީ ތަރައްޤީވެފައިވާ ޤައުމަކަށް ހެދުމަށް ސަރުކާރުން ކުރައްވަމުންދާ މަސައްކަތުގައި، އެކި ދާއިރާތަކުން މަތީ ތަޢުލީމު ހާސިލުކޮށްގެން ތިބި ޒުވާނުންގެ ދައުރު އިންތިހާއަށް ބޮޑުކަމަށް ވިދާޅުވިއެވެ.
"ރާއްޖޭގެ މުހިއްމު ސިނާޢަތްތަކުގެ އިސް މަޤާމުތަކުގައި ދިވެހީން ނެތުމުގެ މައްސަލަ ނުވަތަ ދިވެހީން މަދުވުމުގެ މައްސަލަ އެބައޮތް. މިއީ އަޅުގަނޑުމެން އެންމެންވެސް ކަންބޮޑުވާކަމެއް. މިމައްސަލައަށް އޮތް އެންމެ ދެމެހެއްޓެނިވި ހައްލަކީ ތިޔަ ދަސްވެނީން އެފަދަ މަޤާމުތަކަށް އިސްވެގެންދިޔުން،" ސިނާޢަތްތަކުގެ އިސް މަޤާމުތަކާ ދިވެހީން ހަވާލުވުމުގެ މުހިންމުކަމަށް އަލިއަޅުއްވާލައްވަމުން ވަޒީރު ޝިޔާމް ވިދާޅުވިއެވެ.
މީގެއިތުރުން، ދަސްވެނީން އުފެއްދުންތެރި އީޖާދީ ވިސްނުން ގެންގުޅުމަށާއި، ކަންކަމުގައި އިސްނެގުމުގެ ސިފަ އަށަގަންނުވުމަށް ވަޒީރު ބާރުއެޅުއްވިއެވެ. އަދި ކިޔަވައި ނިމިގެން ވަޒީފާގެ މާޙައުލަށް ނުކުންނައިރު، މަސައްކަތުގެ މާޙައުލުގައި ހިފަހައްޓަންޖެހޭ އެންމެ މަތީ އަޚްލާޤީ މިންގަނޑުތައް ހިފެހެއްޓުމަށާއި، ތެދުވެރިކަމާއެކު ޤައުމަށް ޚިދުމަތްކުރުމުގައި ދެމިތިބުމަށް ހަނދާންކޮށްދެއްވިއެވެ.
ވަޒީރުގެ ވާހަކަފުޅު ނިންމަވާލައްވަމުން، އެކި ދާއިރާތަކުން ޤައުމަށް ބޭނުންވާ ފަންނީ މީހުން ބިނާކުރުމުގައި ވިލާ ކޮލެޖުން އަދާކުރަމުންދާ މުހިންމު ދައުރު ފާހަގަކުރައްވައި، އެ ކޮލެޖުގެ މެނޭޖްމަންޓަށާއި ވެރިންނަށް ޝުކުރު އަދާކުރެއްވިއެވެ.
