ރާއްޖޭގައި އުޅޭ ބިދޭސީން އިތުރުވާ މައްސަލައަށް ރަނގަޅު ހައްލެއް ނުގެނެވޭނަމަ ވަރަށް ނުރައްކާތެރި ޙާލަތަކަށް ޤައުމުގެ ކަންކަން ހިނގައިދާނެ ކަމަށް ޖޭޕީގެ ކައުންސިލް މެންބަރު އަޙްމަދު ތައުފީޤް (ޓޯޕީ) ވިދާޅުވެއްޖެއެވެ.
އަޙްމަދު ތައުފީޤް ވިދާޅުވީ ރާއްޖޭގައި ތިބި ބޮޑެތި މީހުންގެ އާބާދީ އާއި އެއްވަރުގެ އަދަދަކަށް ބިދޭސީން ރާއްޖޭގައި މިހާރު އެބަ ތިބި ކަމަށެވެ. މިއީ ޤައުމަށް ވަރަށް ނުރައްކާތެރިކަމެއް ކަމަށެވެ. "ބަލަން އެބަޖެހޭ ހަމަ މިއެންމެންނަކީ ރާއްޖޭގައި ބައިތިއްބަން ޖެހޭ ބައެއްކަން ނުވަތަ ނޫންކަން. މިއީ ބޭނުންވާ ވަރަށްވުރެ އިތުރު އަދަދެއް ނަމަ ބޭނުންވާ އަދަދަށް މަދުކުރަންޖެހޭނީ."
އަޙްމަދު ތައުފީޤް ވިދާޅުވީ ޢަރަބި ޤައުމުތަކުގައިވެސް ގިނަ އަދަދެއްގެ ބިދޭސީން މަސައްކަތްކުރާ ކަމަށާއި ނަމަވެސް އެމީހުންނަށް އެ ޤައުމުތަކުގައި އުޅެވެނީ ވަރަށް ހަރުދަނާ ޤާނޫނުތަކާއި ޤަވާއިދުތަކުގެ ތެރެއިން ކަމަށެވެ. ނަމަވެސް ރާއްޖޭގައި މިފަދަ އުޞޫލުތަކެއް ނެތް ކަމަށާއި ކަންކަން މިވަނީ މުޅިންހެން ބޮއްސުންލައިގެން ގޮސްފައި ކަމަށެވެ.
އަޙްމަދު ތައުފީޤް ވިދާޅުވީ ރާއްޖޭގައި މަސައްކަތްކުރާ ބިދޭސީންނަށް ދިވެހިންނާއި ކައިވެނި ކުރެވެން ޖެހޭނީ ވެސް އެކަމަށް ހެދިފައި ހުންނަ ހަރުދަނާ ޤަވާއިދުތަކެއްގެ ތެރެއިން ކަމަށެވެ. ޢަރަބި ޤައުމުތަކުގައި ވެސް މިކަން ކުރަމުން އަންނަނީ ހަރުދަނާ ޤަވާއިދުތަކެއްގެ ތެރެއިން ކަމަށެވެ. "ހަމަ އެހެން ހުރެލާފައި ރާއްޖޭގައި ހުރުމަށް ފަސޭހަކޮށްލަން ކައިވެނި ކުރެވޭ ގޮތަށް އޮތުމަކީ މައްސަލައެއް." ކަމަށެވެ.
