ފާއިތުވި 5 އަހަރު ދުވަހު ވެރިކަން ކުރި ސަރުކާރުން ހާމަނުކޮށް ފޮރުވާފައި އޮތް ރާއްޖޭގެ މާލީ ޙާލަތު އަންނަ ހަފްތާއިން ފެށިގެން ރައްޔިތުންނަށް ހާމަކުރައްވަމުން ގެންދަވާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. ކ. ދިއްފުށީގައި ވާހަކަފުޅު ދައްކަވަމުން ރައީސް އިބްރާހީމް މުޙައްމަދު ޞާލިޙް މިއަދު ވިދާޅުވީ މުއައްސަސާތަކާއި ބައްދަލުކުރައްވައި ކަންކަން ހުރި ގޮތުގެ ހަޤީޤީ ޙާލަތު ގެންދަވަނީ ވަރަށް ގާތުން ބައްލަވަމުން ކަމަށެވެ.
"މާލީ ކަންކަމުގައި ވެސް ބަދަލުކުރަންޖެހޭ ކަންކަން ވަރަށް ގިނަކަން ވަނީ ފާހަގަކުރެވިފައި. ކޮރަޕްޝަނަށް ހުޅުވިފައިވާ ދޮރުތައް ބަނދުކޮށް އަޅުގަނޑަސް ލިބިފައިވާ ވަސީލަތްތަކާއި މުއްސަނދިކަން ދިވެހި މުޖުތަމައުގެ ތަރައްޤީ އަށާއި ރައްޔިތުންގެ މަންފާއަށް ރަނގަޅު ގޮތުގައި ބޭނުންކުރުމަކީ އަޅުގަނޑުމެންގެ އެންމެ މުހިންމު ވާޖިބު." ރައީސް އިބްރާހީމް މުޙައްމަދު ޞާލިޙް ވިދާޅުވީ އަންނަ ހަފތާއިން ފެށިގެން ކޮންމެ ހަފްތާއަކު ރާއްޖޭގެ މާލީ ޙާލަތު ހާމަކުރަމުން ގެންދާނީ ފިނޭންސް މިނިސްޓްރީން ކަމަށެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ މިސަރުކާރުން ވެރިކަމާއި ހަވާލުވިއިރު ރާއްޖޭގެ ރަށްތަކާއި ފަޅުތަކުގެ ތެރެއިން ކުއްޔަށް ދެވި އަދި ވިއްކާލެވިފައިވަނީ ކިތައް ރަށްކަމާއި ފަޅުކަން އޮތީ ނުއެނގުމުގެ ތެރޭގައި ކަމަށާއި ނަމަވެސް ފާއިތުވި ހަފްތާގައި އެކަމުގެ ތަފްޞީލުތައްވެސް ޓޫރިޒަމް މިނިސްޓްރީން މިހާރު ވާނީ ހާމަކުރެވިފައި ކަމަށެވެ. "އިރާދް ކުރެއްވިއްޔާ އަޅުގަނޑުމެންގެ ސަރުކާރު ވާނީ ރައްޔިތުންނާއި ގާތުން ވެރިކަން ކުރާ، އަދި ހާމަކަން ބޮޑު ގޮތަކަށް ކަންކަން ކުރާ ސަރުކާރަކަށް." ކަމަށްވެސް ރައީސް ޞާލިޙް ވިދާޅުވިއެވެ.
