ވައްކާއި ކޮރަޕްޝަނުގެ ތެރެއިން ދައުލަތަށް ގެއްލިފައިވާ ފައިސާ އަނބުރާ ހޯދުމުގެ މަސައްކަތް މިހާރު ފަށައިގެން ކުރިއަށް ގެންދާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ކ. ދިއްފުށީގައި ވާހަކަފުޅު ދައްކަވަމުން ރައީސް އިބްރާހީމް މުޙައްމަދު ޞާލިޙް މިއަދު ވިދާޅުވީ އެމަނިކުފާނުގެ ވައުދުތަކުގެ ތެރޭގައި ހިމެނޭ ބައެއްކަންކަން މިހާރުވެސް ވަނީ ކުރަން ފަށާފައި ކަމަށާއި އެގޮތުން ގޮތް ނުއެނގޭ ގޮތަށް މަރާލާފައިވާ މީހުންގެ މައސަލަތަކާއި ގެއްލުވާލާފައިވާ މީހުންގެ މައްސަލަތަކުގެ ހަޤީޤަތް ހޯދުމުގެ މަސައްކަތް މިހާރު ވެސް ދަނީ ކުރިއަށް ކަމަށެވެ.
ރައީސް އިބްރާހީމް މުޙައްމަދު ޞާލިޙް މިއަދު ވިދާޅުވީ ކުރީ ސަރުކާރުން ކައުންސިލުތަކުގެ ކިބައިން ނިއުޅައިގެންފައިވާ ބާރުތައް މިފެށޭ ހަފްތާގައި މާލެ ސިޓީ، އައްޑޫ ސިޓީ އަދި ފުވައްމުލަކު ސިޓީ ކައުންސިލްތަކާއި ހަވާލުކުރައްވާނެ ކަމަށެވެ. "ރައްޔިތުން ބާރުވެރިކޮށް ރައްޔިތުންނާއި ގާތުން ޚިދުމަތް ދެވޭނީ ކައުންސިލުތައް ބާރުވެރިކުރުވައިގެން. އެކަން ކުރެވެން އޮތީ މިހާރު އޮތް ލާމަރުކަޒީ ޤާނޫނު އިޞްލާޙްކޮށްގެން." ކަމަށްވެސް ރައީސް ޞާލިޙް ވިދާޅުވިއެވެ.
