ޒިނޭ ކުރެވިއްޖެނަމަ އިސްލާމް ދީނުގައި އޮންނަނީ އެމީހަކު އެކަން ސިއްރުކުރުމެވެ. އަދި އެވާހަކަ އެހެން މީހެއްގެ ގާތުގައި ނުދެއްކުމެވެ. އަދި އެކަމަށް ﷲ ގެ ޙަޟްރަތުން ތައުބާވުމެވެ. އަދި އެކަން ތަކުރާރު ނުކުރުމެވެ. "ކިހައި ރިވެތި ދީނެއްތޯ އިސްލާމް ދީނަކީ؟ މާޝާ ﷲ! ޒިނޭގެ މައްސލައިގައި އަމިއްލައަށް އިޤްރާރުވުމަކަށް އިސްލާމް ދީން ބާރެއް ނުއަޅައެވެ.
ނަމަވެސް އަމިއްލަ އިޢްތިރާފުން ނުވަތަ 4 ހެކިންގެ ހެކިބަހުން ސާބިތުވެއްޖެނަމަ އަދަބަކީ ބިކުރުވެރިކަމާއިއެކު ކުރެވުނު ކަމަކަށްވާނަމަ 100 އެތިފަހަރުން ހައްދުޖެހުމާއިއެކު 1 އަހަރު ދުވަހަށް އަރުވާލުމެވެ. މުޙްޞަނެއް ނަމަ ރަޖަމު ކުރުމެވެ. މުޙްޞަނަކީ ކައިވެންޏެއްގެ ތެރެއިން އެއް ފަހަރު ނަމަވެސް ޖިމާޢްވުމުގެ ލައްޒަތު ލިބިފައިވާ މީހާއެވެ. މިއީ ﷲތަޢާލާގެ ޙުކުމްފުޅެވެ.
ބިކުރުވެރިޔާ ޒިނޭކޮށް އެކަންސާބިތުވެއްޖެ ނަމަ އޭނާގެ ގައިގައި 100 އެތިފަހަރުން ހައްދުޖެހުމާއިއެކު 1 އަހަރު ދުވަހަށް އަރުވާލުން ހިމެނެއެވެ. އަދި ދަންނަންވީ ޒިނޭއަކީ އެންމެ ބޮޑު އެއް ފާފަކަމެވެ. ހަލާކަށް ވައްތާލަނިވި 7 ފާފައިގެ ތެރޭގައިވެސް ހިމެނޭ ފާފައެއް ކަމެވެ. ޝައިޚް ޢަލީ ޒައިދު ވިދާޅުވީ ޢިލްމުވެރިން ދައްކަވަމުން ގެންދަވަނީ ވަކި ޙައްދެއްގެ ވާހަކަ ނޫން ކަމަށާއި ހުރިހާ ޙައްދުތަކެއްގެ ވާހަކަފުޅު ވެސް ދައްކަވަމުން ގެންދަވާ ކަމަށެވެ. އެހެންކަމާއިއެކުވެސް ކަމަކަށް ނަޞޭޙަތެއް ދެއްވައިފިނަމަ މިވެނި ކަމެއްގެ ވާހަކަ ނުދައްކަނީ ކީއްވެގެންތޯ ބައެއް މީހުން ސުވާލުކުރާ ކަމަށެވެ. "ކިހިނެއްތޯ އަޅުގަނޑުމެން ހުރިހާ ކަމެއްގެ ވާހަކަ އެންމެ މެސެޖަކުން ހާމަކުރާނީ؟" --ޝައިޚް ޢަލީ ޒައިދު
