ސަރުކާރުން ހިންގާ ތަރައްޤީގެ މަޝްރޫޢުތަކާއި ގުޅޭ އެއްވެސް ކަމެއްގައި ކޮރަޕްޝަނުގެ އެއްވެސް ފައިސާއެއް ހުށަނުއެޅުމަށް މިނިސްޓަރ މުޙައްމަދު އަސްލަމް ގޮވާލައްވައިފިއެވެ. ކ. ދިއްފުށީގައި ޤާއިމުކުރި ބޯފެނާއި ނަރުދަމާގެ ނިޒާމު އިފްތިތާޙްކުރުމަށް މިއަދު އެރަށުގައި ބޭއްވި ރަސްމިއްޔާތުގައި މިނިސްޓަރ އަސްލަމް ވިދާޅުވީ މަޝްރޫޢުތައް ހިންގޭނެ ޤާބިލު ދިވެހި ކުންފުނިތައް ރާއްޖޭގައި އެބަހުރި ކަމަށާއި އެކުންފުނިތަކާއި މަޝްރޫޢުތައް ހަވާލުކުރައްވާނެ ކަމަށެވެ.
ނަމަވެސް ކަންކަން ކުރައްވާނީ އެކަން ކަމަށް އޮންނަ އުޞޫލުން ކަމަށެވެ. "އަޅުގަނޑަށް މީހަކު މެސެޖުކޮށްފަ ބުނެފި މަޝްރޫޢެއް މިނިސްޓްރީގަ އޮންނާނެއޭ. އެކަން އަވަސްކޮށްލަ ދޭށޭ. އެއް ލައްކަ ޑޮލަރު އަސްލަމަށޭ. އަޅުގަނޑު އެރީ ރަތަށް.
އެއީ މިބާވަތުގެ ކަންކަމަކީ އަޅުގަނޑު އެއްގޮތަކަށް ވެސް ބަލައިގަންނާނެ ކަންކަމަށް ނުވާތީ." އަސްލަމް ވިދާޅުވީ ތަރައްޤީގެ މަޝްރޫޢުތައް ޕްލޭން ކުރުމުގައި މައްސަލަތަކެއް އެބަހުރި ކަމަށާއި މަޝްރޫޢެއް ފަށައި ނިމޭއިރު ބަނދަރުގެ ޖާގަކުޑަވުން ފަދަ ކަންކަން މެދުވެރިވަނީ ޕްލޭން ކުރުމުގައި ކުރިއަށް ނުވިސްނާތީ ކަމަށެވެ. އެހެންކަމުން މިސަރުކާރުން މަޝްރޫޢުތައް ޕްލޭން ކުރާނީ އެކަންކަމަށް ބަލައިގެން ކަމަށެވެ.
