"ޙަރާމް ގޮތުގައި ފައިސާ ހޯދައިގެން ތިމާގެ އަމިއްލަ ނަފްސާއި އަނބިދަރިން ބޮޑުވާ ބޮޑުވުން އެއީ ﷲ ތަޢަލާއަށް ތިމާ ކުއްތަންވުމާ ﷲ ތަޢާލާއަށް ކުރާ ދުޢާ އިޖާބަ ނުވުމުގެ ސަބަބެކެވެ. އަޅުގަނޑުމެންގެ ވިޔަފާރިތައް ބަލަންވީ ﷲ ތައާލާ ރިވެތި ތަކެތި ޙަލާލުކުރައްވަވާފައިވާއިރު އެތަކެތިން ވިޔަފާރިކޮށް ޙަރާމް ތަކެތިން ދުރުވުމަށެވެ."
މިއީ ޝައިޚް ޢަބްދުﷲ ބިން މުޙައްމަދު އިބްރާހީމް ވިދާޅުވެފައިވާ ބަސްފުޅެކެވެ. ޢިލްމުވެރިން ބަޔާންކުރައްވަވާ ގޮތުގައި ޙަރާމް ތަކެތީގެ ތެރޭގައި ހިމެނެނީ ހަމައެކަނި ބަނގުރަލާއި އޫރުމަސް ފަދަތަކެތި އެކަންޏެއް ނޫނެވެ. ވައްކަމާއި ކޮރަޕްޝަން ފަދަ ޙަރާމް ކަންކަމުން ހޯދާ ފައިސާ ވެސް އެއީ ހަމަ ހަރާމް ތަކެއްޗެވެ. ޙަރާމް ގޮތުގައި ހޯދާ ފައިސާއިން ކުރާ ވިޔަފާރިތަކުގައި ބޭނުންކުރެވެނީވެސް ހަމަ ޙަރާމް ތަކެއްޗެވެ.
މިބަސްފުޅުން އެނގެނީ ޙަރާމް ގޮތުގައި ހޯދާ ފައިސާއިން ގެދޮރު ބިނާކޮށް ކުއްޔަށްދީގެން ހޯދާ ފައިސާވެސް ހިމެނިގެންދާނީ ހަމަ ޙަރާމް ފައިސާގެ ތެރޭގައި ކަމެވެ.
ޙަރާމް ގޮތުގައި ހޯދާ ފައިސާ އަމިއްލައަށް ބޭނުންކޮށް އަދި ޢާއިލާއަށް ޚަރަދު ކޮށްގެން ތިމާގެ އަމިއްލަ ނަފްސާއި އަނބިދަރިން ބޮޑުވާ ބޮޑުވުން އެއީ ﷲ ތަޢަލާއަށް ތިމާ ކުއްތަންވުމާ ﷲ ތަޢާލާއަށް ކުރާ ދުޢާ އިޖާބަ ނުވުމުގެ ސަބަބެއް ކަމުގައިވާއިރު އާޚިރަތް އެދޭ މީހާ މިކަންކަމަށް ސަމާލުކަން ދޭންޖެހޭނެ މިންވަރު ޝައިޚުގެ މިބަސްފުޅުން ހާމަވެގެންދެއެވެ.
