އިންޑިއާގެ އަސްކަރީ ބޭސްއެއް ރާއްޖޭގައި ހެދުމުގެ ފުރުޞަތު ރާއްޖެއިން ނުދޭނެކަން، އެކަން ކުރާނެ ކަމުގެ ޚަބަރު ފަތުރަމުން ގެންދާ އިންޑިއާގެ ނޫސްވެރިންނަށް ވެސް އެނގޭނެވަރު ޚާރިޖީ ވަޒީރު ޢަބްދުﷲ ޝާހިދު ކުރައްވައިފިއެވެ.
ޢަބްދުﷲ ޝާހިދު މިހާރު ވަނީ ދިވެހިބަހުން ކުރެއްވި ޓްވީޓް އިނގިރޭސިބަހުންވެސް ކުރައްވައިފައެވެ. އަދި އެކަމާއި ގުޅޭ ރަސްމީ ބަޔާނެއްވެސް ވަނީ ފޮރިން މިނިސްޓްރީން ނެރެފައެވެ.
އެހެންކަމުން މިކަމުގައި އިތުރަށް އޮޅުން ނުފިލައިގެން އުޅެން އިންޑިއާގެ ނޫސްވެރިންނަށް ޖެހޭނެ ކަމަކަށް ޤަބޫލެއް ނުކުރެވެއެވެ. ރާއްޖެއަށް 1 ބިލިއަން ޑޮލަރުގެ ލޯނު އެހީއެއް ދިނުމުގެ އަގަކީ ރާއްޖޭގެ މިނިވަންކަމާއި އިސްތިޤްލާލް ވިއްކާލަން ޖެހުން ކަމަށް ނުވަތަ ރާއްޖެ އޮތީ އެހައި ދަށު ދަރަޖައިގައި ކަމަށް އިންޑިއާގެ ބައެއް ނޫސްވެރިންނަށް ޤަބޫލުކުރެވުނުކަމުން އެނގެނީ އެ ނޫސްވެރިންނަށް ރާއްޖޭގެ ޙާލަތު އެއްވެސް ވަރަކަށް ނުއެނގޭ ކަމެވެ.
ފ އަތޮޅު މަޝްރޫއު 100% މުސްލިމް ސައުދިއަރަބިޔާއަށް ދީގެން 10 ބިލިއަން ޑޮލަރު ހޯދެން އޮއްވައި އެކަން ނުކުރި ބައަކު 1 ބިލިއަން ޑޮލަރަށް އިންޑިއާއަށް ޤައުމުގެ މިނިވަންކަމާއި އިސްތިޤްލާލް ވިއްކައި ނުލާނެކަން އެނގުން ރަނގަޅުވާނެއެވެ.
