ރައީސް އިބްރާހީމް މުޙައްމަދު ޞާލިޙްގެ ސަރުކާރަށް މާލީ ދަތިކަން މިހާ ބޮޑުވީ މަޝްރުޢު ކުރިއަށް ގެންދަނެ އެއްވެސް ފައިސާއެއް ހަމަ ނުޖައްސައި ގިނަ މަޝްރޫޢުތަކެއް ކުރީ ސަރުކާރުން ފަށާފައި ހުރުމުން ކަމަށް ޚާރިޖީ ވަޒީރު ޢަބްދުﷲ ޝާހިދު އާއި ހަވާލާދީ ޔޫއޭއީގެ ބައެއް ނޫސްތަކުގައި ހާމަކޮށްފިއެވެ.
"މަޝްރޫޢުތަކަށް ބޭނުންވާ ފައިސާ އެއްވެސް ވަރަކަށް ހަމަ ނުޖައްސައި ރައީސް ޔާމީނުގެ ސަރުކާރުން ވަނީ މިދިއަ އަހަރުގެ ރިޔާސީ އިންތިޚާބާއި ދިމާކޮށް ހިންގަން ފަށާފަ. އެ މަޝްރޫޢުތައް ހުއްޓާލުމަކީ ވެސް ކުރެވެން އޮތް ކަމެއް ނޫން. އެ މަޝްރޫޢުތަކަށްވުރެ މާ މުހިންމު ވައުދުތައް ރައީސް އިބްރާހީމް މުޙައްމަދު ޞާލިޙްގެ އެބަހުރި. އެހެންވީމާ މިވަގުތު ރާއްޖެއަށް މާލީ އެހީތެރިކަން ވަނީ ވަރަށް ބޮޑަށް ބޭނުންވެފަ." ޝާހިދު އާއި ހަވާލާދީ ބައެއް ނޫސްތަކުގައި ބުނެފައިވެއެވެ.
ޝާހިދު މިމޭރުމުން ވިދާޅުވެފައިވާއިރު ރައީސް ޔާމީނު މިދިއަ އަހަރު ކުއްލި ގޮތަކަށް ހިންގަން ފެށި ބައެއް މަޝްރޫޢުތައް ހިންގަން ފަށާފައިވަނީ ބަޖެޓުގައި ހިމަނައިގެނެއްވެސް ނޫނެވެ. އަދި އެ މަޝްރޫއުތައް ހިންގުމަށް އެއްވެސް ފައިސާއެއް ހަމަޖައްސައިގެނެއްވެސް ނޫންނެވެ. ނަމަވެސް އެއިން އެއްވެސް މަޝްރޫޢެއް ހުއްޓާލައިފިނަމަ ނުވަތަ ކުރިއަށް ގެންދިއުން ލަސްވާނަމަ ރައްޔިތުންގެ ކަންބޮޑުވުން އިތުރުވާނެއެވެ.
17 ނޮވެމަބރުގައި ޚާރިޖީ ވަޒީރު ކަމާއި ހަވާލުވެވަޑައިގަތުމަށްފަހު ޝާހިދު ރާއްޖެއިން ބޭރަށް ފުރަތަމަ ދަތުރުފުޅު ކުރައްވާފައިވަނީ އަވަށްޓެރި އިންޑިއާ އަށެވެ. އިންޑިއާ އިން ވަނީ މާލީ އެހީތެރިކަން ފޯރުކޮށްދޭނެ ކަމުގެ އުންމީދު ދީފައެވެ. އެހެންކަމާއިއެކުވެސް އިންޑިއާ އިން ހުށަހަޅާ ކަމަށް އިންޑިއާގެ ނޫސްތަކުގައި ބަޔާންކުރާ ޝަރުޠުތައް ބަލައިގަތުމުގައި ރާއްޖެއަށް މައްސަލަތަކެއް އެބަހުރިކަން ގިނަ ބައަކު ދަނީ ފާހަގަކުރަމުންނެވެ.
