ރާއްޖޭގެ މިނިވަންކަމާއި އިސްތިޤްލާލަށް އުނިކަމެއް އަތުވެދާނެ އެއްވެސް ކަމެއް މިސަރުކާރުން ނުކުރާނެ ކަމުގެ ޔަޤީންކަން ސަރުކާރުން ދީފި އެވެ. ސަރުކާރުގެ ފަރާތުން މިކަން ހާމަކޮށްފައިވަނީ ދިވެހި ޚާރިޖިއްޔާއިން އިއްޔެ ނެރެފައިވާ ރަސްމީ ބަޔާނެއްގައެވެ.
އެބަޔާނުގައި ބުނެފައިވަނީ ރާއްޖެއަށް ބޭނުންވާ މާލީ އެހީތެރިކަމާއި އެހެންވެސް ކަމަކާއި ގުޅުވައިގެން ރާއްޖޭގައި އިންދިއާގެ އަސްކަރީ ބޭސްއެއް ހަދަން އުޅޭ ކަމަށްބުނެ މީޑިއާތަކުގައި (އިންޑިއާގެ މީޑިއާތަކުން) ފަތުރަނީ އެއްވެސް ޙަޤީޤަތެއް ނެތް ދޮގުވާހަކަތަކެއް ކަމަށެވެ.
ޚާރިޖިއްޔާއިން ނެރެފައިވާ ބަޔާނުގައި ބުނެފައިވަނީ އެއީ އެއްވެސް އަސާސެއް ނެތި ފަތުރަމުން ގެންދާ ދޮގު ވާހަކަތަކެއް ކަމަށެވެ. އަދި އެފަދަ ވާހަކަތައް ފަތުރަނި ރާއްޖެއާއި އިންޑިއާގެ މެދުގައި ބަދަހިވަމުން އަންނަ ގުޅުމަށާއި ބައިނަލްއަޤްވާމީ މުޖުތަމައުއާއިއެކު ރާއްޖެއިން ބަދަހިކުރަމުން އަންނަ ގުޅުންތަކަށް ހުރަސްއެޅުމުގެ ގޮތުން ކަމަށެވެ.
ސަރުކާރުން މަސައްކަތް ކުރަމުން ގެންދާނީ ދިވެހި ޤައުމާއި ރައްޔިތުންގެ ހައްޤުގައި ކަމަށާއި ރާއްޖޭގެ މިނިވަންކަމާއި އިސްތިޤްލާލަށް އުނިކަމެއް އަތުވެދާނެ އެއްވެސް ކަމެއް މިސަރުކާރުން ނުކުރާނެ ކަމުގެ ޔަޤީންކަން ސަރުކާރުން ރައްޔިތުންނަށް ދޭ ކަމަށްވެސް އެ ބަޔާނުގައި ބުނެފައިވެއެވެ.
އިންޑިއާއަކީ ރާއްޖޭގެ އެންމެ "ގާތް" ޤައުމު ނަމަވެސް ރާއްޖެއާއި ބެހެ ގޮތުން އެންމެ ގިނަ ދޮގު މައުލޫމާތާއި ރާއްޖެއަށް އެންމެ ބޮޑަށް ގެއްލުން ލިބޭނެ ޚަބަރުތައް ފަތުރަމުން ގެންދަނީ އިންޑިއާގެ ބައެއް މީޑިއާތަކުންކަން ފާހަގަކުރެވެއެވެ.
