ކުރީގެ ޑިފެންސް މިނިސްޓަރ ތޮލްހަތު އިބްރާހިމް ކަލޭފާނުގެ މައްޗަށް އިއްވާފައިވާ ޖަލު ހުކުމް ސުޕްރީމް ކޯޓުން މިއަދު ބާތިލުކޮށްފިއެވެ.
ކުރީގެ ރައީސް މުޙައްމަދު ނަޝީދުގެ ވެރިކަމުގައި، 2012 ގައި ކްރިމިނަލް ކޯޓުގެ އެއިރުގެ އިސް ގާޒީ އބްދުﷲ މުޙައްމަދު، ގާނޫނާއި ޚިލާފަށް ބަންދުކުރި މައްސަލައިގައި ތޮލްހަތުގެ މައްޗަށް އިއްވި 10 އަހަރުގެ ހުކުމަށް ހައިކޯޓުން އޮތީ ތާއީދު ކޮށްފައެވެ. ހައިކޯޓުގެ ނިންމުން އިސްތިއުނާފު ކުރުމަށް ތޮލްހަތުގެ ފަރާތުން އެއިރު ހުށަހެޅި މައްސަލަ ބަލައިނުގަތުމަށް ސުޕްރީމް ކޯޓުން ނިންމާފައި އޮތުމަށްފަހު، އެކޯޓުން ފަހުން ވަނީ އެނިންމުން ރިވިއު ކުރުމަށް ނިންމައިފައެވެ.
ތޮލްހަތުގެ ޖަލު ހުކުމް ބާތިލުކުރުމަށް މިއަދު ސުޕްރީމް ކޯޓުން ކަނޑައެޅީ، އޭނާއާއެކު އެމައްސަލައިގައި ޖަލަށްލާން ހުކުމް ކުރި ކުރީގެ ރައީސް މުޙައްމަދު ނަޝީދުގެ ޖަލު ހުކުމް ވެސް އެކޯޓުން މިހަފްތާ ތެރޭގައި ބާތިލު ކޮށްފައިވުމުންނެވެ.
ސުޕްރީމް ކޯޓުން މިއަދު ނެރުނު އަމުރުގައި ބުނެފައިވަނީ އަބްދުﷲ ގާޒީ ހައްޔަރު ކުރި ކުރުން ޓެރަރިޒަމްގެ އަމަލެއްގެ ގޮތުގައި ބެލީ ރަނގަޅަށް ނޫން ކަމަށް ރައީސް ނަޝީދުގެ މައްސަލައިގައި އެކޯޓުން ކަނޑައަޅާފައިވާ ކަމަށާއި ތޮލްހަތުގެ މައްސަލައަކީ ވެސް އެއް ހާދިސާއަކާއި ގުޅޭ ދެ މައްސަލައެއްކަން ފާހަގަކޮށް އެހެންކަމުން ތޮލްހަތުގެ މައްސަލައިގައި ވެސް އޭނާގެ އަމަލު ޓެރަރިޒަމްގެ އަމަލެއްގެ ގޮތުގައި ބަލައި ހުކުމް ކުރީ ގާނޫނާއި ޚިލާފަށް ކަމަށެވެ.
