ސަރުކާރުގެ ފުރަތަމަ މަސްއޫލިޔަތަކަށް އިސްލާމް ދީނުގެ ބޮޑެތި އަސާސްތައް ނަގަހައްޓައި ދެމެހެއްޓުން ހެދުމަށް ޝައިޚް ޢަލީ ޒައިދު އިލްތިމާސްކުރައްވައިފި އެވެ.
ޝައިޚް ޢަލީ ޒައިދު ވިދާޅުވީ އަންހެނުންގެވެސް ކުޑަކުދިންގެވެސް އަދި އެންމެންގެވެސް ހައްޤުތައް އެންމެ ބޮޑަށް ގުޅިފައިވަނީ ވަނީ އިސްލާމް ދީނުގެ އަސާސްތަކާއި ކަމަށްވާއިރު އެންމެ ބޮޑު އިސްކްމެއް ދޭންޖެހޭނީ އިސްލާމް ދީނުގެ ބޮޑެތި އަސާސްތައް ނަގަހައްޓައި ދެމެހެއްޓުމަށް ކަމަށް ޤަބޫލުފުޅު ކުރައްވާ ކަމަށެވެ.
ޝައިޚް ޢަލީ ޒައިދު ވިދާޅުވީ މުޖުތަމައުގައި ދޮގުހެދުން ވެސް މިވަނީ ބިރުގަންނަން ޖެހޭ މިންވަރަށް ޢާންމުވެ ބޮޑު ވަބާއަށްވެފައި ކަމަށާއި އެއްވެސް ބިރެއް ނެތި ދޮގުހެދުމަކީ މުނާފިޤް ކަމުގެ ޢަލާމާތެއް ކަމަށެވެ. އެހެންކަމުން މިއީ ވަރަށް ބޮޑަށް އެންމެންވެސް ސަމާލުކަން ދޭން ޖެހިފައިވާ ކަމެއް ކަމަށެވެ.
ޝައިޚް ޢަލީ ޒައިދު ވިދާޅުވީ ދީނުގެ ކަންކަން އޮޅުން ފިލުވައިދޭން މަސައްކަތްކުރާ ދީނީ ޢިލްމުވެރިންނަށް މަލާމާތް ކުރުމާއި ފުރައްސާރަކުރުން ވެސް ދަނީ އިތުރުވަމުން ކަމަށެވެ. އިސްލާމް ދީނުގެ ޢިލްމު ޙާޞިލު ނުކޮށް ތިބި މީހުން ގެންދަނީ ކިޔަވައިގެން ތިބި މީހުންނަށްވުރެ ބޮޑަށް ދީނުގެ ކަންކަން އެނގޭ ކަމަށް ހެދި އިލްމުވެރިންގެ ބަސްފުޅުތަކާ ދެކޮޅު ހަދަމުން ކަމަށެވެ.
ރާއްޖޭގައި އިސްލާމް ދީން ހިމާޔަތްކޮށް ކުރިއެރުވުމަށްޓަކައި މިފަދައިން ހުރި މައްސަލަތައް އިޞްލާޙްކުރުމަށް ގަދަ އަޅައި މަސައްކަތް ކުރަންފެށުމުގެ މުހިންމުކަންވެސް ޝައިޚް ޢަލީ ޒައިދު ވަނީ ފާހަގަކުރައްވައިފައެވެ.
