ފުލުހުންގެ އިންޓެލިޖެންސްގެ ކުރީގެ ވެރިޔާ މުހައްމަދު ހަމީދު (އެމްސީ) ފުލުހުންގެ ވަޒީފާއިން ވަކިކުރީ ގޯސްކޮށް ކަމަށް ދައުލަތުން މިއަދު ސުޕްރީމް ކޯޓުގައި އެއްބަސްވެއްޖެ އެވެ.
ފުލުހުންގެ ސިއްރު މައުލޫމާތުތަކެއް ލީކުކުރި ކަމަށް ބުނެ 2012 ވަނަ އަހަރުގެ އޯގަސްޓް މަހުގައި ވަޒީފާއިން ވަކިކުރި ހަމީދުގެ މައްސަލާގައި ސިވިލް ކޯޓުން ނިންމާފައި އޮތީ ހަމީދަށް އަލުން ވަޒީފާ ދިނުމަށެވެ. ނަމަވެސް ހައި ކޯޓުން 2016 ވަނަ އަހަރު ހުކުމް ކުރީ، ހަމީދު ވަޒީފާއިން ވަކި ކުރީ ރަނގަޅަށް ކަމަށެވެ.
އެ މައްސަލަ ހަމީދުގެ ފަރާތުން ސުޕްރީމް ކޯޓުގައި އިސްތިއުނާފް ކުރުމުން މިއަދު ބޭއްވި އަޑުއެހުމުގައި ދައުލަތުން ވަނީ އޭނާ ވަޒީފާއިން ވަކި ކުރުމުގައި އަމަލު ކުރަން ޖެހޭ އިޖްރާއާތުތައް ފުރިހަމަ ނުކުރާ ކަމަށް އެއްބަސްވެފަ އެވެ. އަދި ގަވާއިދު އޮންނަ ގޮތުން ފުލުހަކު ވަޒީފާއިން ވަކިކުރެވޭނީ ކޮމިޝަނާ އޮފް ޕޮލިސްއަށް އެކަން ހުށަހަޅައި، ހޯމް މިނިސްޓަރަށް އެކަން ލިޔުމުން އަންގައިގެން ކަމަށާއި ނަމަވެސް ހަމީދުގެ މައްސަލާގައި އެގޮތަށް އަމަލު ކޮށްފައި ނެތް ކަމަށް ވެސް ދައުލަތުން ބުނެފައިވެއެވެ.
ހަމީދުގެ ވަކީލް ހުސައިން ސިރާޖް ވިދާޅުވީ ހަމީދު ވަކިކުރަން ނިންމުމުގެ ކުރިން ޑިސިޕްލިނަރީ ބޯޑުން އޭނާގެ ބަސް ހޯދަން ޖެހޭ ކަމަށާއި ނަމަވެސް އެގޮތަށް އަމަލު ކޮށްފައި ނެތް ކަމަށެވެ. އެހެންކަމުން ހަމީދު ވަޒީފާއިން ވަކިކުރަން ނިންމި ނިންމުން ބާތިލްކޮށް، އޭނާ ކުރިން ހުރި ފެންވަރުގެ ވަޒީފާއެއް އަލުން ދިނުމަށް އަމުރުކޮށް ދިނުމަށް ވެސް ވަކީލު ސިރާޖް އެދިވަޑައިގަތެވެ.
