ރާއްޖޭގައި އެއްވެސް ބޭރު ޤައުމެއްގެ އަސްކަރީ މަރުކަޒެއް ހަދާނެ ފުރުޞަތު ނުދެއްވާނެ ކަމަށް ޚާރިޖީ ވަޒީރު ޢަބްދުﷲ ޝާހިދު ވިދާޅުވެއްޖެއެވެ. ޝާހިދު ވިދާޅުވީ ރާއްޖެއަށް ބޭރުގެ އެހީ ހޯއްދަވާނީ ރާއްޖޭގެ މިނިވަންކަމާއި އިސްތިޤްލާލަށް ބުރުލެއް ނާރާނެ ގޮތުގެމަތިން ކަމަށާއި ރާއްޖޭގެ މިނިވަންކަމާއި އިސްތިޤްލާލަށް ބުރޫ އަރާނެ އެއްވެސް އެއްބަސްވުމެއް އެއްވެސް ޤައުމަކާއިއެކު ޤާއިމު ނުކުރެވޭނެ ކަމަށެވެ.
ޝާހިދު މިފަދަ މޭރުމަކުން ވިދާޅުވެފައި މިވަނީ ރާއްޖެއަށް 1 ބިލިއަން ޑޮލައރުގެ މާލީ އެހީތެރިކަމެއް އިންޑިއާއިން ފޯރުކޮށްދޭން އުޅޭ ކަމަށާއި ނަމަވެސް އެކަމުގެ ޝަރުޠުތަކުގެ ތެރޭގައި ރާއްޖޭގައި އިންޑިއާ ސިފައިން ދާއިމީ ގޮތެއްގައި ހިމެނޭކަމަށް އިންޑިއާގެ ބައެއް ނޫސްތަކުގައި ހާމަކުރުމާއި ގުޅުމާއި ދިވެހިންގެ ގިނަ ބައަކު ކަންބޮޑުވުން ފައުޅުކުރަމުން ގެންދާ ވަގުތެއްގައެވެ.
"ރާއްޖެއަށް ބޭރުގެ އެހީ ހޯދާނީ ރާއްޖޭގެ މިނިވަންކަމާ އިސްތިޤްލާލަށް ބުރުލެއް ނާރާނެ ގޮތުގެމަތިން. ރާއްޖޭގައި އެއްވެސް ބޭރު ޤައުމެއްގެ އަސްކަރީ މަރުކަޒެއް ހަދާކަށް ފުރުޞަތެއް ނުދޭނަން. އެފަދަ އެއްބަސްވުމެއް އެއްވެސް ޤައުމަކާއި ނުކުރެވޭނެ."
