"ﷲގެ ޢަޛާބް އަންނާނެކަން ޔަޤީން" ކަމަށް ބަޔާން ކުރެއްވެވި އާޔަތް އިވިވަޑައިގަތުމުން ޢުމަރުގެފާނު އެތައް ފަހަރަކު ހޭފުޅު ނެތުނެވެ. ހޭފުޅު އަރާއިރަށް އެއާޔަތް ހަނދުމަފުޅުވުމުން ހޭފުޅު ނެތެނީއެވެ. ބައެއް ޞަޙާބީން ކުޑަކުދިން ފަދައިން އިންތިހާއަށް ކީރިތި ކުރެއްވެވިއެވެ. ސުވާލަކީ ހަމަ މިއާޔަތުގެ އަޑު އިވުމުން ތިބާޢަށް އެއްވެސް އަސަރެއް ކުރޭ ހެއްޔެވެ؟
އަމީރުލްމުއްމިނީން ޢުމަރު ބުނި ޢަބްދުލްޢަޒީޒްގެ ޒަމާނުގައި އެކަލޭގެފާނުގެ ގެކޮޅަށް ގޮސް އެހީތެރިވެދީ އުޅުމުގެ ގޮތުން އުޚުތަކަށްވެފައި ހުރި އަންހެނަކު އެއްދުވަހަކު ދެންނެވިއެވެ. "އަޅުގަނޑު ރޭ ހުވަފެނެއް ދުށީމެވެ. އެހުވަފެނުގައި ޖެހެނީ ނަރަކަ ހުރަސްކޮށް އަޅާފައި އޮތް ފާލަމެއް ހުރަސް ކުރާށެވެ. ހުސްކުރަން އުޅުނު ފުރަތަމަ މީހާ ނަރަކައަށް ވެއްޓުނީ އެވެ. ދެވަނަ މީހާވެސް ނަރަކައަށް ވެއްޓުނީއެވެ. 3 ވަނައަށް ވަޑައިގެންނެވީ ތިބާއެވެ."
އެހިސާބަށް ދެންނެވިތަނާ އަމީރުލްމުއުމިނީން ހޭފުޅު ނެތިއްޖެއެވެ. އެތައް މަސައްކަތަކުން ހޭފުޅުއެރުވުމުން އެ އަންހެން މީހާ ދެންނެވިއެވެ. "އަމީރުލްމުއުމިނީންއެވެ. ކަލޭގެފާނު ނަރަކައަށް ވެއްޓިވަޑައިނުގެން ސަލާމަތްވެވަޑައިގެންނެވިއެވެ." އަމީރުލްމުއްމިނީނަށް ހަމަޖެހުމެއް ލިބިވަޑައިގަތީ އެހިސާބުންނެވެ.
ބަޔާން ކުރަން ބޭނުންވަނީ ﷲ ތަޢާލާގެ ޢަޛާބުގެ ގަދަފަދަކަން އިޙްޞާޞްކުރެވޭ މީހާ، ހިތުގެ އަޑިން އެކަން ޤަބޫލުކުރެވޭ މީހާ އެކަމަށް އިންތިހާއަށް ބިރުގަންނާނެ ކަމެވެ. އެއަށްވުރެ ބޮޑު ބިރެއް އަދި ކަންބޮޑުވުމެއް އެމީހަކަށް ނުއޮންނާނެ އެވެ. މިކަމުގެ ހެއްކަކީ ބައެއް ޞަޙާބީން އެހައި ގިނަ ހެޔޮ އަމަލުތައް ކުރައްވަމުން އަދި ނަހީކުރެއްވެވި އެއްވެސް ކަމެއް ނުކުރައްވަވަމުން ވެސް ނަރަކައަށް ބިރުފުޅުން ރޭގަނޑު އަވަހާރަފުޅު ނުލެއްޕެވިގެން ހޭފުޅުލައްވައި ތިއްބެވި ކަމެވެ.
ލޮބުވެތި އަޚުންނާއި އުޚުތުންނޭވެ. އަޅުކަންކުރާއިރު ދެކަމެއް ހިތުގައި ބާއްވަން ޖެހެއެވެ. ފުރަތަމަ ކަމަކީ ތިމާކުރާ އަޅުކަން ﷲ ތަޢާލާ ޤަބޫލުފުޅު ކުރައްވަވައި ސުވްރުގެ ވައްދަވާނެ ކަމުގެ އުންމީދެވެ. ދެވަނައަށް ހިތުގައި ބާއްވަން ޖެހެނީ ތިމާ ކުރާ އަޅުކަން ޤަބޫލުފުޅު ނުކުރައްވަވައި ނަރަކައިގެ ޢަޛާބު ލިބޭ މީހުންގެ ތެރޭގައި ތިމާ ހިމެނިދާނެ ކަމެވެ.
އެހެންކަމުން އަހަރެމެން އަބަދުވެސް ވާންޖެހޭނީ ހެޔޮ އަމަލެއް ކުރަން ލިބޭ ކޮންމެ ފުރުޞަތެއްގައި އުންމީދާއިއެކު ހެޔޮ އަމަލުކުރާ މީޙަކަށެވެ. ހަމަ އެއާއިއެކު ކިތަންމެ ފަހި ފުރުޞަތެއް ލިބުނު ނަމަވެސް ކިތަންމެ ކުޑަނަމަވެސް ފާފައެއް ނުކުރާ މީހަކަށެވެ.
- ބިލާލް އައްސަދުގެ ދަރުސަކުން
