އެމްޕީއެލް ސަރަހައްދުން ހުރިހާ ވަގުތުތަކެއްގައި ކާބޯތަކެތި ނެރެވޭނެ ގޮތް ހަމަޖައްސަން ޓްރާންސްޕޯޓް މިނިސްޓްރީން ނިންމައިފިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރ ޢައިޝަތު ނަހުލާ ވިދާޅުވީ ރައީސް އިބްރާހީމް މުޙައްމަދު ޞާލިޙްގެ ސަރުކާރުން ފުރަތަމަ 30 ދުވަހުގެ ތެރޭގައި ފުރިހަމަކުރަން ނިންމާފައިވާ 6 ވައުދުގެ ތެރެއިން 2 ވައުދެއްވެސް 2 ދުވްހެއްގެ ތެރޭގައި ފުދިގެންދާނެ ކަމަށެވެ. އެއީ މާލެއާއި ހުޅުމާލޭގައި އިތުރު ބަސް ސްޓޮޕްތައް ހެދުމާއި މާލޭގައި މުދައު އަރުވައި ބާލާނެ ސަރަހައްދުތަކެއް ކަނޑައެޅުން ކަމަށެވެ.
މީގެ އިތުރުން މިނީބަހުގެ ބަސްދަތުރުތައް ފެށުމަށް ބަސް ހޯދުމުގެ މަސައްކަތް ކުރެވެމުން އަންނަކަމަށްވެސް ޢައިޝާ ވިދާޅުވިއެވެ.
މިބައްދަލުވުމުގައި ރަފީޢް ވިދާޅުވީ 13 ޖަނަވަރީގައި ސްކޫލްތައް ހުޅުވަންދެން ބޯޓުފަހަރުން "ލޯޒް ކާގޯ" ގެ ގޮތުގައި ގެންނަ އަލުވި، ފިޔާ ބިސް ފަދަ ތަކެތި 24 ގަޑިއިރު މިހާރު އެމްޕީއެލް ސަރަހައްދުން ނެރެވޭނެ ކަމަށެވެ. އަދި އެކަމުގެ ސަބަބުން ތަޒާކަންމަތީގައި އެތަކެތި ލިބުމަށް މަގުފަހިވާނެ ކަމަށެވެ.
މީގެ އިތުރުން ކޮންޓޭނަރުގައި ގެންނަ ތަކެތިވެސް މިއަދުން ފެށިގެން ކޮންމެ ދުވަހަކުވެސް މެންދުރުފަހު 3.00 އިން ފެށިގެން އެމްޕީއެލް ސަރަހައްދުން ނެރެވޭނެ ގޮތް ވެސް ވަނީ ހަމަޖައްސައިފައެވެ.
