ދިވެހި މުޖުތަމަޢުގައި އެކަކު އަނެކަކަށް އިޙުތިރާމްކުރުމުގެ ރިވެތި އާދަ އަލުން ދިރުވައި، ދިވެހިވަންތަކަން ރައްކާތެރިކުރުމުގެ މަޤްޞަދުގައި ސަރުކާރުން އިސްނަގައިގެން ކުރިއަށްގެންދާ ބޮޑު ޤައުމީ މަޝްރޫޢު "އިޙުތިރާމް އަދާކުރުން" މި އަންނަ ހޮނިހިރު ދުވަހުގެ ރޭ ރަސްމީކޮށް އިފްތިތާޙުކުރުމަށް ހަމަޖެހިއްޖެއެވެ.
ފަންނާއި ސަގާފަތާއި ތަރިކައާ ބެހޭ ވުޒާރާއިން އިންތިޒާމުކުރާ މި ތާރީޚީ ހަރަކާތް ބޭއްވުމަށް ހަމަޖެހިފައިވަނީ މާލޭގެ މާފަންނު ޓްރެކް ދަނޑުގައެވެ. މި ހަފުލާއަށް ވާންޖެހޭ އެންމެ ފަހުގެ ތައްޔާރީތައް މިހާރު ފުރިހަމަކުރެވެމުންދާއިރު، މިއީ މިހާތަނަށް ރާއްޖޭގައި މިފަދަ ދާއިރާއަކުން ކުރިއަށްގެންދެވޭ އެންމެ ފުޅާ އަދި އެންމެ ބިޔަ ޤައުމީ މަޝްރޫޢެވެ.
މި ޤައުމީ ހަރަކާތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްޞަ އިސްނެންގެވުމާއި ތަޞައްވުރުގެ ދަށުން ކުރިއަށްގެންދާ ކެމްޕޭނެކެވެ. ދިވެހިންގެ ތެރޭގައި އެކަކު އަނެކަކަށް ގަދަރުކުރުމާއި، އަދަބުއިޙުތިރާމް އަދާކުރުމުގެ މާތް ސިފަ ފަނޑުވަމުންދާތީ، އެކަން ހައްލުކުރުމަށް މިފަދަ ޤައުމީ މަޝްރޫޢެއް ފައްޓަވާނެކަން ރައީސުލްޖުމްހޫރިއްޔާ އެންމެ ފުރަތަމަ އިޢުލާނުކުރެއްވީ މިއަހަރުގެ ޖުލައި މަހުގެ 9 ވަނަ ދުވަހު ބޭއްވި ރަސްމިއްޔާތެއްގައެވެ.
ފަންނާއި ސަގާފަތާއި ތަރިކައާ ބެހޭ ވަޒީރު ހީނާ ވަލީދު މީޑިއާތަކަށް މައުލޫމާތު ދެއްވަމުން ވިދާޅުވީ، މިއީ މުޅި މުޖުތަމަޢާއި އެކި ދާއިރާތަކުގެ ފަންނުވެރިންނާއި، ކުދިބޮޑު އެންމެހައި ރައްޔިތުން އެކުއެކީގައި ބައިވެރިވާނެ ވަރަށް ވަރުގަދަ ޤައުމީ މަސައްކަތެއް ކަމަށެވެ. އަދި ހޮނިހިރު ދުވަހުގެ ރޭ މާފަންނު ޓްރެކް ދަނޑުގައި އޮންނަ ކުލަގަދަ ރަސްމިއްޔާތުގައި، މި މަޝްރޫޢުގެ ރަސްމީ ލޯގޯ އާއި ޚާއްޞަ ޝިޢާރު އެކުލެވޭ ރަސްމީ ލަވަ އިފްތިތާޙުކުރުން އޮންނާނެ ކަމަށްވެސް ވަޒީރު ހާމަކުރެއްވިއެވެ.
މި ރަސްމިއްޔާތުގައި ސަރުކާރުގެ އިސްވެރިންނާއި، ރައްޔިތުންގެ މަޖިލީހުގެ މެންބަރުންނާއި، ފަންނީ ދާއިރާތަކުގެ އިސް ފަރާތްތަކުގެ އިތުރުން ގިނަ އަދަދެއްގެ އާންމު ރައްޔިތުން ބައިވެރިވާނެއެވެ. މި މަޝްރޫޢުގެ މައިގަނޑު އަމާޒަކީ ދިވެހި ޤައުމިއްޔަތާއި ތަރިކަ ދިރުވައި، އިސްލާމީ މާތް އަޚްލާޤާއި ދިވެހި ސަގާފަތުގެ އަގުވަޒަންކޮށް، އެކުވެރި އެއްބައިވަންތަ މުޖުތަމަޢެއް ބިނާކުރުމެވެ.
މި ތާރީޚީ އަދި ޤައުމީ ބޮޑު ހަފުލާ ރާއްޖޭގެ ގިނަ މީޑިއާތަކުން ވަގުތުން ދުރަށް ދެއްކުމަށް ވަނީ ހަމަޖެހިފައެވެ.
