ސިޔާސީ މަޤާމުތަކާއި، ސަރުކާރުގެ ކުންފުނިތަކުގެ ބޯޑުތަކަށް ޢައްޔަނު ކުރައްވާ ބޭފުޅުންނަށް މަޢުލޫމާތު ފޯމެއް އެކުލަވާލައްވައި،އެފޯމު ފުރިހަމަކުރައްވާ ގޮތަށް ހަމަޖައްސަވައިފި
ސިޔާސީ އެކި މަޤާމުތަކަށާއި، ސަރުކާރުގެ ކުންފުނިތަކުގެ ބޯޑުތަކަށް ޢައްޔަނު ކުރައްވާ ބޭފުޅުންގެ މަޢުލޫމާތު ހިމެނޭގޮތަށް ފޯމެއް އެކުލަވާލައްވައި، އެބޭފުޅުން ފުރިހަމަކުރައްވާ ގޮތަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ހަމަޖައްސަވައިފިއެވެ. މިގޮތުން ފޯމުގައި ހިމެނޭ މަޢުލޫމާތުތަކުގެ ތެރޭގައި، އެ މަޤާމަކަށް ޢައްޔަނުކުރެވޭ ބޭފުޅެއްގެ ޢާންމު މަޢުލޫމާތާއި، އެބޭފުޅެއްގެ ތަޢުލީމީ ފެންވަރާއި، ތަމްރީނާއި ތަޖުރިބާއާއި، އެބޭފުޅަކަށް ލިބިވަޑައިގަންނަވާ އާމްދަނީއާއި، އެބޭފުޅެއްގެ މުދަލާއި، ފައިސާއާއި، ދަރަންޏާބެހޭ މަޢުލޫމާތު ހިމެނެއެވެ. މި ދެންނެވި މަޤާމުތަކަށް ޢައްޔަނު ކުރައްވާ ބޭފުޅުންނަށް އެ މަޤާމުތައް ދެއްވާނީ މި އިޤްރާރު، އެބޭފުޅަކު ފުރިހަމަކުރެއްވުމުން، އޭގައިވާ މަޢުލޫމާތުތަކަށް ބެއްލެވުމަށްފަހުގައެވެ.
އަދި މި އިޤްރާރުގެ 4 ވަނަ ނަންބަރުގައިވާ އާމްދަނީއާއި، މުދަލާއި، ފައިސާއާއި، ދަރަންޏާބެހޭ މަޢުލޫމާތު ހާމަކުރައްވާ ގޮތަށް ވަނީ ހަމަޖައްސަވާފައެވެ.
