މަރާލެވިފައިވާ ނުވަތަ ގެއްލުވާލާފައިވާ މީހުންގެ މައްސަލަތައް 30 ދުވަހުގެ ތެރޭގައި ހުށަހެޅުމަށް، މަރާލެވިފައިވާ ނުވަތަ ގެއްލުވާލާފައިވާ މީހުންގެ މައްސަލަ ތަހުގީގު ކުރާ ކޮމިޝަނުން އަންގައިފިއެވެ.
އެކޮމިޝަނުން މިއަދު އާންމުކުރި ސާކިއުލާއެއްގައި ބުނެފައިވަނީ 1 ޖެނުއަރީ 2012 އިން ފެށިގެން 17 ނޮވެމްބަރ 2018 ގެ ނިޔަލަށް، އެމުއްދަތުގައި މަރާލާފައިވާ ނުވަތަ ގެއްލުވާލާފައިވާ މައްސަލަތައް ތަހުގީގު ކުރުމަށްޓަކައި 26 ނޮވެމްބަރ 2018 އިން ފެށިގެން 30 ދުވަހުގެ ތެރޭގައި ލިޔުމަކުން އެކޮމިޝަނަށް ހުށަހެޅުމަށެވެ.
އެކޮމިޝަނަކީ، 1 ޖެނުއަރީ 2012 އިން ފެށިގެން 17 ނޮވެމްބަރ 2018 ގެ ނިޔަލަށް، ވޭތުވެދިޔަ މުއްދަތުގެ ތެރޭގައި މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލައި ތަހުގީގުކޮށް، އެމައްސަލަތަކުގެ ހަގީގަތް ހޯދައި އިންސާފު ހޯދައި ދެއްވުމަށް ރައީސް އިބްރާހިމް މުޙައްމަދު ސޯލިޙު އުފެއްދެވި ކޮމިޝަނެކެވެ.
މިކޮމިޝަން އުފައްދާފައި ހުންނަނީ ޣާޒީ ބިލްޑިންގ ގެ އެންމެ ތިރީބައިގައެވެ.
