ގެއްލުވާލާފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާން ގެ މައްސަލައިގެ ތަހުގީގަށް ޓޫރިޒަމް މިނިސްޓަރ މިއަދު ބަޔާން ދެއްވައިފިއެވެ.
މަރާލެވިފައިވާ އަދި ގެއްލުވާލެވިފައިވާ މީހުންގެ މައްސަލަ ތަހުގީގު ކުރާ ކޮމިޝަނަށް މިއަދު ވަޑައިގެން މިނިސްޓަރ އަލީ ވަހީދު ބަޔާން ދެއްވިކަން އެކޮމިޝަނުން ވެސް ވަނީ ޔަގީން ކޮށްދެއްވާފައެވެ.
އެކޮމިޝަންގެ ރައީސް ހުސްނު ސުއޫދް ވިދާޅުވީ އަލީ ވަހީދުގެ އިތުރުން ވެސް އެމައްސަލައިގެ ތަހުގީގަށް މީހުން ހާޒިރުކޮށް ބަޔާން ނަންގަވަމުން ގެންދާ ކަމަށެވެ.
ގެއްލިފައިވާ އަދި މަރާލެވިފައިވާ މީހުންގެ މައްސަލަތަކުގެ ތަހުގީގު ކުރިއަށް ގެންދާނީ ބޭރުގެ ޖަމިއްޔާތަކާއި ފަންނީ ތަޖުރިބާކާރުންގެ އެހީއާއެކު ކަމަށް މީގެ ކުރިން ހުސްނު ސުއޫދް ވިދާޅުވެފައިވެއެވެ. އަދި މިފަދަ މައްސަލަތަކުގެ އެންމެ ފުނަށް ދެވޭނެ ކަމުގެ ޔަގީންކަން ވެސް އެމަނިކުފާނު ދެއްވާފައިވެއެވެ.
ނޫސްވެރިޔާ ރިލްވާން ގެއްލުވާލާފައިވަނީ 2012 ވަނަ އަހަރުގެ އޯގަސްޓް މަހުގެ 8 ން ފެށިގެންނެވެ. އޭނާއަށް ވީނުވީއެއް އެދުވަހުން ފެށިގެން މިއަދާއި ހަމައަށް ވެސް ހޯދިފައި ނުވާއިރު، ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ގެ ވެރިކަމުގައި ވަނީ، ރިލްވާން ގަދަކަމުން ފޮރުވި ކަމަށް ބުނެ ދެމީހެއްގެ މައްޗަށް ދައުވާ ވެސް ކޮށްފައެވެ. ނަމަވެސް އެދެމީހުންގެ މައްޗަށް ކުށް ސާބިތު ނުވާ ކަމަށް ބުނެ ފަހުން އެޝަރީއަތް ވަނީ ނިންމާލާފައެވެ.
