މިދިޔަ 65 އަހަރުގެ ތެރޭގައި ރާއްޖޭގައި މަރުގެ ހުކުމް ތަންފީޒު ކޮށްފައި ނުވާތީ މިސަރުކާރުންވެސް އެގޮތަށް އަމަލުކުރުމަށް ނިންމާފައިވާ ކަމަށް ފޮރިން މިނިސްޓްރީން މިއަދު ބުނެފިއެވެ.
ފޮރިން މިނިސްޓްރީން ބުނެފައިވަނީ "މޮރެޓޯރިއަމް އޮން ދަ ޔޫޒް އޮފް ޑެތު ޕެނަލްޓީ"ގެ ނަމުގައި އދ. އިން އެކުލަވާލާފައިވާ ގަރާރުގެ ދެލިކޮޕީއަށް ރާއްޖޭން ވޯޓު ދިނުމަށްވެސް ނިންމާފައިވާ ކަމަށެވެ.
މަރުގެ އަދަބު ތަންފީޒު ކުރުން މަނާކުރުމަށް އދ. އިން އެކުލަވާލާފައިވާ މިގަރާރަށް ވޯޓަށް އަހާނީ ސްވިޒަލޭންޑްގެ ޖެނީވާގައި މިހާރު ކުރިއަށްދާ އދ. ގެ އިންސާނީ ހައްގުތަކުގެ ކޮމިޝަންގެ ސެޝަންގަ އެވެ. މިބައްދަލުވުމުގައި ދިވެހި ސަރުކާރު ތަމްސީލް ކުރައްވާ އެންމެ އިސް ބޭފުޅަކީ ރައީސް އޮފީހުގެ ވަޒީރު އަހްމަދު ނަސީމު އެވެ.
ރާއްޖޭގައި މަރުގެ ހުކުމް ތަންފީޒުކުކުމަށް އެންމެބޮޑަށް ވަކާލާތުކުރައްވާ ކުރީގެ ހޯމްމިނިސްޓަރ އުމަރު ނަސީރު މިކަމާގުޅިގެން މިއަދު ވިދާޅުވީ ރާއްޖޭގައި މަރުގެ އަދަބު ތަންފީޒު ނުކުރުމަށް މި ސަރުކާރުން ނިންމެވި ނިންމެވުމާއިމެދު ހިތާމަކުރައްވާކަމަށެވެ.
އުމަރު ވިދާޅުވީ ގިސާސް ހިފުމަކީ މީހުން މެރުމާއި، ވަޅި ހެރުމަށް އޮތް ހައްލުކަމަށާއި އަމާންކަން ގާއިމްކުރެވޭނީ ގަސްތުގައި މީހުން މަރާ މީހުންނަށް މަރުގެ އަދަބު ދެވިގެންކަމަށެވެ. އަދި ރާއްޖޭގައި މަރުގެ ހުކުމް ތަންފީޒުކުރާނެ ރައީސަކީ އިރާދަކުރެއްވިއްޔާ އެމަނިކުފާނުކަމަށްވެސް އުމަރު ވިދާޅުވިއެވެ.
ރާއްޖޭގައި މީހެއްގެ މައްޗަށް މަރުގެ އަދަބު އެންމެ ފަހުން ތަންފީޒުކޮށްފައިވަނީ .މީގެ 65 އަހަރުކުރިންނެވެ.
