ޒިނޭ ކުރުމުން ނަމަވެސް އަދި ރޭޕްކޮށްގެން ނަމަވެސް ލިބޭ ދަރިންނަކީ މަޢްޞޫމް ކުދިން ކަމަށާއި ލިބޭ ދަރިން މެރުން ހުއްޓައިލުމަށް ޝައިޚް ޢަލީ ޒައިދު ގޮވާލައްވައިފިއެވެ.
ޝައިޚް ޢަލީ ޒައިދު ވިދާޅުވީ ކޮންމެ ސަބަބެއް މެދުވެރިވެގެން ނަމަވެސް ލިބޭ ދަރިންނަކީ މައްޞޫމް ފުރާނަތަކެއް ކަމަށެވެ. އަދި އެކުދިންގެ ކުށަކީ ކޮބައިތޯ އާއި އެ ތުއްތު ކުދިންނަށް އަނިޔާކުރާއިރު އަދި މަރާއިރު ހިތުގައި ރަޙްމާއި ކުލުނު ކޮބައިތޯ ވެސް ޝައިޚް ޢަލީ ޒައިދު ވަނީ ސުވާލުކުރައްވައިފައެވެ. ޝައިޚް ޢަލީ ޒައިދު މިމޭރުމުން ވިދާޅުވެފައިވަނީ ގދ ވާދޫ އަންހެނަކު ވިހެއުމަށްފަހު ދަރިފުޅު ބާލިދީއަކަށްލާފައި އޮއްވާ ރޭ ފެނިފައިވާ މައްސަލައާއި ގުޅިގެންނެވެ.
ދީނީ ޢިލްމުވެރިން ބަޔާން ކުރައްވާ ގޮތުގައި ކުށެއް ކުރެވިއްޖެނަމަ އޮތީ ތައުބާވުމެވެ. ދަރިންނަށް އަނިޔާ ކުރުމާއި މެރުމަކީ އަމިއްލައަށް ލިބިގަންނަ އިތުރު ފާފަތަކެވެ. ދުނިޔޭގެ ލަދަށްވުރެ ނަރަކައިގެ އަލިފާނުގެ ހޫނު މާގަދަވާނެއިރު ދުނިޔޭގެ ލަދަށްޓަކައި ޢާޚިރަތް ނަގައިލުމަކީ އެއްވެސް މީހަކު ކޮށްގެންވާނެ ކަމެއް ނޫން ކަމަށެވެ. އުފަންވާތަނުން ކުއްޖަކު މެރުމާއި ކޮންމެ އުމުރެއްގެ މީހަކު ނަމަވެސް މެރުމުގައި އެއްވެސް ތަފާތެއް ނެތް ކަމަށްވެސް ދީނީ ޢިލްމްވެރިން ބަޔާން ކުރައްވަވައެވެ.
