އެއްވެސް ޤައުމެއްގެ މިލިޓަރީ (އަސްކަރީން، ސިފައިން) އެހެން ޤައުމެއްގައި ދާއިމީ ގޮތަކަށް ތިބެން ވެއްޖެނަމަ ހާލިހަދާނެ ކަމަށް ޝައިޚް ޢަލީ ޒައިދު ވިދާޅުވެއްޖެއެވެ.
ޝައިޚް ޢަލީ ޒައިދު ވިދާޅުވީ ދިވެހިރާއްޖޭގައި ބޭރު ޤައުމެއްގެ ސިފައިން ދާއިމީ ގޮތެއްގައި ބެއިތިއްބުމަކީ ކަންބޮޑުވެވަޑައިގަންނަވާ ކަމެއް ކަމަށާއި ޤައުމުގެ އަމުނާ އިސްތިޤްލާލް ހިމާޔަތްކޮށް ދެމެހެއްޓުމަކީ ޤައުމުގެ އަފްރާދުންގެ ވާޖިބެއް ކަމަށެވެ.
ޝައިޚް ޢަލީ ޒައިދު މިމޭރުމުން ވިދާޅުވެފައިވާއިރު ޚާއްޞަ ޙާލަތެއް މެދުވެރިވެގެންނާއި ތަމްރީނުތަކަށް ނޫނީ އެހެން ޤައުމެއްގެ ސިފައިން ބެއިތިއްބުމަކީ ކުރާކަމެއް ނޫން ނަމަވެސް ރާއްޖޭގައި އިންޑިއާ ސިފައިން ބައިތިއްބާ ކަމުގެ އަޑުތަކެއް ވަނީ ފެތުރިފައެވެ.
ނޮވެމްބަރު 3 ގެ އުދުވާނީ ހަމަލާ އާއި ގުޅިގެން ރާއްޖެ ހިމާޔަތްކޮށްދޭން އައި ސިފައިން ވަނީ އަހަރު ދުވަހަށްފަހު އެނބުރި ގޮސްފައެވެ. އިންޑިއާ ސިފައިން އެއިރު އެނބުރި ދިއައީ ދިވެހި ސިފައިންނަށް ބޭނުންވާ ތަމްރީނުތައް ދިނުމަށްފަހުގައެވެ.
