ވަގު ޓިކެޓް ވިއްކުމުން އަސްކޮއި ގްރޫޕުން ޢުމުރާއަށް ނުފުރުނު 50 މީހުން މާދަމާ ފުރުވާލަން ހަމަޖެހިފައިވާ ކަމަށް އެ ގްރޫޕުން ބުނެފިއެވެ. އެ ގްރޫޕުން ބުނެފައި ވަނީ ނުފުރުނު އެންމެން ފުރުވާލަން ހަމަޖެހިފައިވަނީ މާދަމާ ހެނދުނު 9.30 ގައި ފުރާ ސްރީލަންކަންގެ ފްލައިޓަކުން ކަމަށެވެ. އަސްކޮއި ގްރޫޕް މެދުވެރިކޮށް އުމުރާއަށް ދާ މީހުންނަށް ވަގު ޓިކެޓް ވިއްކި މައްސަލަ ތަޙްޤީޤްކުރަމުން ގެންދާ ކަމާއި އެކަކު ބަންދުކުރެވިފައިވާކަން އިއްޔެ ވަނީ އެނގިފައެވެ.
ހަމަ އެއާއިއެކު ޓިކެޓްތައް އިޝޫކުރީ މުވައްޒިފެއް ކަމަށް ވެސް ބައެއް ޚަބަރުތައް ލިބުނެވެ. ކޮންމެ ތަނަކުން ޓިކެޓް ވިއްކި ނަމަވެސް ޓިކެޓް އިޝޫ ކުރާނީ ތަނުގެ މުވައްޒިފެކެވެ. އޮން ލައިންކޮށް ޓިކެޓް ގަތުމުން ފިޔަވައި އެހެން ގޮތަކުން ކޮންމެ ޓިކެޓެއްވެސް ލިބޭނީ އެތަނެއްގެ މުވައްޒިފަކު ދިނުމުންނެވެ. އެހެންކަމަށްވާއިރު މުވައްޒިފަކު ޓިކެޓް އިޝޫކުރުމަކީ އެ ތަނަކުން ޒިންމާ އުފުލަން ނުޖެހޭނެ ސަބަބެއް ނޫނެވެ.
ޓިކެޓް އިޝޫކުރުމުގެ ޒިންމާ އެތަނަކުން ނުނަގާނަމަ ފުރަތަމަވެސް ބަލަންޖެހޭނެ ކަމަކީ ޓިކެޓް ވިއްކި ފައިސާ ވަދެފައިވާ އެކައުންޓެކެވެ. އަސްކޮއި ގްރޫޕުން ދެއްކި ފައިސާ ޖަމާކޮށްފައިވަނީ އެ އޮފީހުގެ އެކައުންޓަށްތޯ މުވައްޒިފުގެ އެކައުންޓަށްތޯއެވެ. އެފައިސާ އެކައުންޓުން ނަގައި ބޭނުންކޮށްފައިވަނީ ކޮން ފަރާތަކުންތޯއެވެ. މިފަދަ ވާހަކަތައް ދައްކަން ޖެހެނީ މޮރިޝަސް ބޭންކުން ދައުލަތުގެ ބައެއް ކުންފުނިތަކަށާއި އަމިއްލަ ފަރާތްތަކަށް ދީފައިވާ ގެއްލުމުގެ ބޮޑުކަމުންނެވެ.
މައްސަލަތައް މައްސަލަތަކަކަށްވުމުން ބޮލުން ނައްޓާލަން މަސައްކަތް ކޮށްފައިވާތީއެވެ. އެކަންކަމުގެ ސަބަބުން އެތައް މިލިއަން ރުފިޔާއެއް ގެއްލިފައިވާތީއެވެ. ކުންފުނިތަކާއި ރައްޔިތުންގެ ފައިސާ ހިމާޔަތްކުރެވޭނެ، ވައްކަން ކުރުމުން ބަދަލު ހޯދޭނެ އިތުރު ހަރުދަނާ އުޞޫލުތަކެއް ތަޢާރަފްކުރަން ޖެހިފައިވާ ކަމަށް ގިނަ ބައަކު ދަނީ ބުނަމުންނެވެ.
