ރާއްޖެޓީވީގެ ޗީފް އޮޕަރޭޓިން އޮފިސަރ (ސީއޯއޯ) ޙުސެއިން ފިޔާޒް މޫސާ، އެމަގާމުން މިއަދު އިސްތިއުފާ ދެއްވައިފިއެވެ.
މިކަމާއި ގުޅޭގޮތުން ފިޔާޒް އޮންލައިން ނޫހަަކަށް މައުލޫމާތު ދެއްވަމުން ވިދާޅުވީ، ރާއްޖެ ޓީވީގެ ސީއޯއޯ ކަމުގެ ވަކިވި ކަމުގައިވީ ނަމަވެސް، އޭނާގެ ޚިދުމަތް ރާއްޖެ ޓީވީ އަށް ލިބޭނެ ކަމަށެވެ.
ފިޔާޒް ރާއްޖެޓީވީ ގެ ސީއޯއޯ ކަމުގެ މަގާމުން ވަކިވީ ރައްޔިތުންގެ މަޖިލީހުގެ މެމްބަރަކަށް ވެވަޑައިގަތުމުގެ ނުވަތަ މަގާމެއްގެ އުންމީދުގައި ކަމަށް ބުނެ ދެކެވެމުން ދިޔަ ވާހަކަތައް ފިޔާޒް ދޮގު ކުރެއްވިއެވެ.
"ރާއްޖެޓީވީ ގެ މެނޭޖްމެންޓާއި ވެސް މަޝްވަރާ ކޮށްފައި އަޅުގަނޑު ނިންމި ނިންމުމެއް މިއީ. އެއްގޮތަކަށް ވެސް މަގާމެއްގެ އުންމީދުގައި އެޅި ފިޔަވަޅެއް ނޫން" އެނޫހަށް މައުލޫމާތު ދެއްވަމުން ފިޔާޒް ވިދާޅުވެފައިވެއެވެ.
ނޫސްވެރިކަމުގައި 18 އަހަރު އަދި ރާއްޖެޓީވީގެ ސީއޯއޯގެ މަގާމުގައި ތިން އަހަރު ހޭދަ ކުރެއްވި ފިޔާޒް ވިދާޅުވީ، އޭނާ ރާއްޖެޓީވީ އާއި އެންމެ ފުރަތަމަ ގުޅުނުއިރު، އެސްޓޭޝަންގެ ކުރިމަތީގައި އޮތީ ބިރުވެރިކަމާއި މަރުގެ އިންޒާރުތައް ކަމަށެވެ. އަދި ނޫސްވެރިކަމުގެ ފުރިހަމަ ތަޖުރިބައެއް ރާއްޖެޓީވީ ގައި ކުރެވުނު ކަމަށް ވެސް ފިޔާޒް ވިދާޅުވެފައިވެއެވެ.
ފިޔާޒް ރާއްޖެޓީވީ ގެ ސީއޯއޯ ކަމުގެ މަގާމުން އިސްތިއުފާ ދެއްވި ސަބަބު އަދި އެނގިފައެއް ނުވެއެވެ.
