މުސްލިމުންގެ އެންމެ ގިނަ ބައަކު ނަރަކައަށް ވަންނާނީ ކުދި ފާފަތައް ކަމަށް ޤަބޫލުކުރެވި ކުރެވޭ ފާފަތަކުގެ ސަބަބުންކަން ޞަޙީޙް ޙަދީޘްފުޅުން އެނގެން އެބައޮތެވެ. ނަމަވެސް އެކަމަށް ބިރުގަންނަނީ މަދު މީހެކެވެ. އެ ހަދީޘްފުޅަށް ސަމާލުކަން ދެނީ މަދުމީހެކެވެ.
ބައެއް މީހުން ބުނެއެވެ. "ދޮގެއް ބުނެލުމަކީ އެހައި ބޮޑު ފާފައެއް ނޫނެވެ. ކުޑަކުޑަ މަކަރެއް ހަދައިލުމަކީ އެހައި ބޮޑު ފާފައެއް ނޫނެވެ. އަންހެނަކާއި އެކު މިވެނި ކަމެއް ކޮށްލުމަކީ އެހައި ބޮޑު ފާފައެއް ނޫނެވެ. ކުޑަކުޑަ ވައްކަމެއް ކޮށްލި ނަމަވެސް މާ ބޮޑު އަޒާބެއް ނުލިބޭނެއެވެ."
މީސްތަކުންނޭވެ! މިއީ ވަރަށް ނުބައި ވިސްނުމެކެވެ. މިއީ ތިއަބައިމީހުން މަގުފުރެއްދުމަށްޓަކައި، ޝައިޠާނާ ބޭނުންކުރާ އެންމެ ވަރުގަދަ އެއް ހަތިޔާރެވެ. ތިއަ ބައި މީހުން ކޮށްޕައި ގެންގޮސް ނަރަކައަށް ވައްޓައިލަން ބޭނުންކުރާ އެންމެ ވަރުގަދަ އުކުޅެވެ.
އިސްލާމް ދީނުގައި ނަހީވެގެންވާ އެއްވެސް ކަމަކީ ކުޑަ ކަމެއް ކަމަށް ނުދެކޭށެވެ. އެއީ އަޅާނުލައި ދޫކޮށްލެވޭނެ ކަމެއް ނަމަ އިސްލާމް ދީނުގައި އެކަން ނަހީކުރައްވަވާފައެއް ނުވާނެއެވެ. ވީމާ ފާފައިގައި މިން އަޅައިގެން ކުޑަ ބޮޑު ބަލައިގެން ކަންކަން ކުރާ މީހަކަށް ނުވާށެވެ.
މީސްތަކުންނޭވެ! އެންމެ ފާފައެއް ނުކުރަން އަޒުމް ކަނޑައަޅައިގެން ހުންނަ މީހާއަށް ވެސް މިއުޅެނީ ފާފަތަކުން ސަލާމަތް ނުވެވިގެންނެވެ. ފާފަތައް ކުރެވޭތީ ކަންބޮޑުވެގެންނެވެ. އެހެންކަމަށްވާއިރު މިވެނި ފާފައަކީ އެހައި ބޮޑު ފާފައެއް ނޫން ކަމަށް ބަލައި ފާފަތައް ކުރާމީހާގެ ޙާލަކީ ކޮބައިހެއްޔެވެ؟ އެމީހަކަށް ނަރަކައަށް ނުވަދެ ސަލާމަތްވެވޭނީ ކިހިނަކުން ހެއްޔެވެ؟
ފާފައިގައި މިންއަޅާ މީހުންނަށްވާގޮތަކީ މާބޮޑު ނޫން ކަމަށް ބަލައި ކުރެވޭ ފާފަތައް އިތުރުވެގެންދަނީއެވެ. ކުރެވޭ ނުކުރެވޭ ވަރެއްވެސް ނުއެނގެނީއެވެ. އެކަން މިއެނގެނީ ޤިޔާމަތް ދުވަހު ހިސާބު ބައްލަވާ ވަގުތުގައެވެ. ކުދި ފާފަތައް ކަމަށް ހީކޮށް ކުރި ފާފަތައް ގިނަވެ ފުނިފުންޏަށް ޖެހި އެންމެފަހުން އެފާފަތަކުގެ ސަބަބުން ނަރަކައަށް ދާން ޖެހުމުންނެވެ. އެވަގުތު ހިތަށް އަރާނެއެވެ. "އަޅެ މިއިން އެއްވެސް ފާފައެއް ނުކުރެވުނު ނަމައެވެ. މި ފާފަތައް ކޮށްގެން ދުނިޔޭގައި ވެސް ލިބުނު އެއްވެސް ފައިދާއެއްވެސް އޮތީއެއް ނޫން ވިއްޔާއެވެ."
އެނގޭ ހެއްޔެވެ. އެއްވެސް ކަމެއް ޢާންމުކޮށް ކުރަން ފަށައިފިނަމަ އެކަމަކަށް ބިރު ކެނޑޭނެއެވެ. އެކަމެއް ކުރަން ދެވި ހިފާނެއެވެ.
މިސާލަކަށް ބާރަށް ވެހިކަލް ދުއްވާ މީހުންނަށް ބަލާށެވެ. އަބަދު ބާރަށް ދުއްވަން ފެށުމުން ބިރުކެނޑި އަބަދުވެސް ބާރަށް ދުއްވެން ފެށެއެވެ. އެކަން އިޙްޞާޞްވެސް ނުކުރެވެއެވެ. ހޭ ބުއްދި ޖެހެނީ ތަނެއްގައި ޖެހި އެކްސިޑެންޓްވީމައެވެ. އެއިރު އޮންނަނީ ވަގުތު ފާއިތުވެފައެވެ. މީހާ އޮންނަނީ ފުނޑުފުނޑުވެފައެވެ. ގަދަވި ނަމަވެސް ގިނަ ފަހަރު އޮންނަނީ ކޮންމެވެސް ނުކުޅެދުންތެރިކަމަކާއިވެސް ކުރިމަތިލާން ޖެހިފައެވެ.
އާޚިރަތް ދުވަހުގެ ހާލަތު މުޅިން ތަފާތެވެ. އެދުވަހަކީ އެއްވެސް "ފަރުވާއެއް" ލިބުމުގެ ފުރުޞަތު އޮތް ދުވަހެއް ނޫނެވެ. ދުނިޔޭގައި ހުރެ ކުރި އަމަލުތަކުން ނޫނީ ސަލާމަތްކަން ލިބޭނެ ދުވަހެއް ނޫނެވެ. އެއީ ޙުކުމް ކުރެއްވެވުމުގެ ދުވަހެވެ. އޮތީ ދެ ގޮތެކެވެ. އެއްކޮޅުގައި ސުވަރުގެ އާއި ސުވަރުގޭގެ މަތިވެރި ނިޢްމަތްތަކެވެ. އަނެއް ކޮޅުގައި ނަރަކަ އާއި ނަރަކައިގެ ގަދަފަދަ އަޒާބެވެ.
