114،000 ޞަޙާބީން ޙައްޖަތުލްވަދާޢުގައި ރަސޫލް (ޞޢވ) ގެ އަރިއަހުގައި ބައިވެރިވެވަޑައިގެންނެވިއެވެ. ނަމަވެސް ޞަޙީޙް ޙަދީޘް އާއި އެ ނޫން ޙަދީޘްތައް އެއްކުރުމުން ވެސް އެނގެން އޮތީ އެންމެ 1500 ވަރަކަށް ބޭކަލުންގެ ނަންފުޅުތަކެވެ. އެއީ ނިޞްބަތުން ބަލައިފިނަމަ އެންމެ 1.3 އިންސައްތައެވެ. އެއީ ކީއްވެގެން ހެއްޔެވެ؟
އެއީ ކަންކަމުގައި އިސްނަންގަވައިގެން އުޅުއްވެވީ އެންމެ 1500 ވަރަކަށް ބޭކަލުން ކަމުގައިވާތީއެވެ. ޢާޚިރަތާއި ހަމައަށް އެބޭކަލުންގެ ނަންފުޅުތައް ދިރި، ދެމި ހުންނާނެ ގޮތް ﷲ ތަޢާލާ މެދުވެރިކުރައްވަވާފައި އެވަނީ އެހެންވެގެންނެވެ.
ނަބީ ބޭކަލުންނާއި ރަސޫލު ބޭކަލުންގެ ނަންފުޅުތަކުގެ އިތުރުން ދުނިޔޭގައި އުޅުއްވި ހެޔޮލަފާ މުއުމިނުންގެ ވާހަކަތައް ކީރިތި ޤްރްއާނުގައި ވަނީ ބަޔާން ކުރައްވަވައިފައެވެ. ޤިޔާމަތާއި ހަމައަށް ދާންދެން އެބޭކަލުންގެ ނަންފުޅުތަކާއި އެބޭކަލުން ކުރެއްވެވި ޚިދުމަތްތަކުގެ ވާހަތައް ދެމިއޮތުމަށްޓަކައެވެ. އެބޭކަލުންނަށް ލިބިވަޑައިގެންފައި އެވަނީ ކޮންފަދަ މަތިވެރި ޝަރަފެއްތޯއެވެ!
މީސްތަކުންނޭވެ! ލަވަކިޔުން ފަދަ ކަމަކުން ވެސް މަޝްހޫރު މީހަކަށްވެވިދާނެއެވެ. އެފަދަ ކަމަކުން ކިތަންމެ މަޝްހޫރު މީހަކަށް ވެވުނު ނަމަވެސް އެކަމުން ކުރާނެ އެއްވެސް ފައިދާއެއް ނެތެވެ. ފައިދާއެއް ނުކުރި ތަނުގައި ލިބޭނީ ގެއްލުމާއި ހަލާކެވެ.
އިސްލާމް ދީނަށް ނަޞްރުދީ އިސްލާމް ދީން މަތިވެރި ކުރުމުގައި ކުރިއަރައިދާ މިހަކަށްވާށެވެ! ހަމަ ޔަޤީނުން މިދުނިޔޭގައި އެކަމުގެ ފައިދާއެއް ނުފެނުނު ނަމަވެސް، ނުކުރި ނަމަވެސް އާޚިރަތް ދުވަހު ތިބާ ހުންނާނީ އުފަލުން ފުރިފައެވެ. ހެވިދިލިފައެވެ.
ކަން މިހެން އޮތް ނަމަވެސް ގިނަ ބައަކު ބޭނުންވެގެން މިއުޅެނީ ކޮންމެ ކަމެއް ކޮށްގެން ނަމަވެސް މިދުނިޔޭގައި މަޝްހޫރު މީހަކަށްވުމަށެވެ. އެއީ ހަމަ އެމީހުންގެ މޮޔަކަން ބޮޑުކަން ފިޔަވައި ދެން އެހެން ކޮންމެއް ހެއްޔެވެ؟
- އިސްލާމީ ތިލަފަތުގެ ދަރުސަކުން!
