އިޖުތިމާޢީ ޚިދުމަތުގެ ދާއިރާއިން ޖަމާޢަތަށް ފައިދާހުރި މަސައްކަތް ކުރުމުގެ ރޮނގުން ޝަރަފުވެރިކަމުގެ ޤައުމީ އިނާމު މިއަހަރު ހާސިލުކުރައްވާފައިވާ ޝަމީމާ ކަނބުލޭގެފާނު ދެމިއޮތުމުގެ ޢާލަމަށް ދަތުރުކުރެއްވުމާ ގުޅިގެން، އެ ޢާއިލާއަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ތަޢުޒިޔާ ވިދާޅުވެއްޖެއެވެ. ޝަމީމާ ކަނބުލޭގެފާނުގެ އެއް ދަރިކަނބަލެއް ކަމަށްވާ ޢަޒީމާ އާދަމާ ރައީސުލްޖުމްހޫރިއްޔާ މިއަދު ފޯނުން ގުޅުއްވައި ވާހަކަފުޅު ދައްކަވަމުން، މި ޚަބަރު އެއްސެވީ ވަރަށްފުން ހިތާމައާ އެކުގައި ކަމަށާއި، ޢާއިލާއަށް މި ލިބިވަޑައިގެންނެވި ފުން ހިތާމައިގައި ބައިވެރިވެވަޑައިގަންނަވާ ކަމަށް ވިދާޅުވެ، ރައީސުލްޖުމްހޫރިއްޔާގެ އިޚްލާޞްތެރި ތަޢުޒިޔާ ޢާއިލާގެ މެންބަރުންނަށް ރައްދުކޮށްދެއްވުމަށް އެދިވަޑައިގެންނެވިއެވެ.
ޝަމީމާ ކަނބުލޭގެފާނަކީ، ވަރަށް ކުރިއްސުރެ ފެހުމުގެ މަސައްކަތް ކުރައްވަމުން ގެންދެވި، ގިނަ ބަޔަކަށް ފެހުމުގެ މަސައްކަތް ދަސްކޮށްދެއްވުމުގައި ފުޅާ ދާއިރާއެއްގައި ހަރަކާތްތެރިވެވަޑައިގެންފައިވާ ޚިދުމަތްތެރި ބޭފުޅެކެވެ.
އަލްމަރްޙޫމާ ޝަމީމާ ކަނބުލޭގެފާނު ވަނީ މިނިސްޓްރީ އޮފް ޓްރޭޑް އެންޑް އިންޑަސްޓްރީޒުން މުޅި ރާއްޖެއަށް ހުޅުވާލައްވައިގެން އޭރު ބާއްވަވަމުން ގެންދެވި އަތްތެރި މަސައްކަތުގެ މަޢުރަޒުގައި ވަރަށްގިނަފަހަރު ތަކެތި ބައިވެރިކުރައްވައި، އެކި ވަނަތައް ހާސިލުކުރައްވާފައެވެ. އަދި އަލްމަރްޙޫމާ ޝަމީމާ ކަނބުލޭގެފާނު ވަނީ މައްޗަންގޮޅީ އަވަށުން މަޢުރަޒުގައި ބައިވެރިކުރާ ތަކެތިވެސް ހައްދަވައިދެއްވައި، އަވަށުން މަޢުރަޒުގައި ބައިވެރިވާ މީހުންނަށް އެހީތެރިކަން ދެއްވަމުން ގެންދަވާފައެވެ.
އަލްމަރްޙޫމާ ޝަމީމާ ކަނބުލޭގެފާނަކީ، ފެހުމާއި ޖަރީގެ މަސައްކަތް ކުރުމުގެ ރޮނގުން 1993 ވަނަ އަހަރު ޢާންމު ޚިދުމަތުގެ ހިތްވަރު ދިނުމުގެ އިނާމު ލިބިވަޑައިގެންފައިވާ ބޭފުޅެކެވެ. އަދި، އިޖުތިމާޢީ ޚިދުމަތް ކުރުމުގެ ދާއިރާއިން 2007 ވަނަ އަހަރު ވަނީ ހިތްވަރު ދިނުމުގެ އިނާމު ލިބިވަޑައިގެންފައެވެ.
ޝަމީމާ ކަނބުލޭގެފާނަކީ، މާފަންނާއި، ޚާއްޞަކޮށް މައްޗަންގޮޅީ އަވަށުގެ ވަރަށްގިނަ ކަންކަމުގައި ވަރަށް ކުރިއްސުރެ ޢަމަލީގޮތުން ބައިވެރިވެވަޑައިގެން ހިލޭސާބަހަށް މަސައްކަތްތައް ކުރައްވަމުން ގެންދެވި ބޭފުޅެކެވެ. 1979 ވަނަ އަހަރު މާލޭ ފަޅުން ބިން ހިއްކުމާއި، މާލޭގެ މަގުތައް ހެދުމުގެ މަސައްކަތް ފެށިގެންދިޔައިރު، ވެލިބަސްތާތައް ޖެހުމާއި، މަގުހެދުމުގެ މަސައްކަތުގައި އޭރު އުޅުނު މީހުންނަށް އެކަމަށް ހިތްވަރު ދެއްވުމުގެ ގޮތުން އެކިއެކި ފަރިވަޅުތައް ތައްޔާރުކުރައްވައި، ވަރަށް ފޯރިއާއެކު މާލޭގެ އަވަށްއަވަށުން ކުރައްވަމުން ގެންދެވި މަސައްކަތްތަކުގައި މައްޗަންގޮޅި އަވަށުން އެންމެ އިސް ދައުރެއް އަދާކުރެއްވި އެއްބޭފުޅަކީވެސް ޝަމީމާއެވެ. އިޖުތިމާޢީ ގޮތުން ކުރެއްވި މަސައްކަތްތަކުގެ އަގު ވަޒަން ކުރައްވައި ސަރުކާރުން 1980 ވަނަ އަހަރު ޝަމީމާއަށް ވަނީ "ކަމުވޮށިކަމުގެ ދަރަޖަ" އަރުވާފައެވެ. "ކަނބުލޭގެފާނު" ގެ ނަމުން މުޚާޠަބު ކުރެވެން ފެށީ، ކަމުވޮށިކަމުގެ ދަރަޖަ ލިބިވަޑައިގެންނެވި ހިސާބުންފެށިގެންނެވެ.
