އަހަރެމެން ކޮންމެ މީހަކީވެސް ސުވަރުގެ އެދިގެން މަސައްކަތްކުރާ މީހެކެވެ. އެންމެ ބޮޑަށް ބޭނުންވާ ކަމަކީވެސް ސުވަރުގެ ދިއުން ކަމަށްވެސް އެބަ ބުނަމުއެވެ. ސުވާލަކީ ތިބާގެ ހަޔާތް ނިމިގެންދާއިރު އިސްލާމް ދީން މަތިވެރިކުރުމަށްޓަކައި ނުވަތަ ނަގަހައްޓަން ތިބާއަށް ކޮށްދެވުނީ ކޮން މަސައްކަތެއް ހެއްޔެވެ؟
އިސްލާމީ ތާރީޚަށް ބަލާށެވެ. ރަސޫލް (ޞޢވ)ގެ ހަޔާތްޕުޅަށް ބަލާށެވެ. އެކި ކަންކޮޅުތަކުން ނުހަނު ޒުވާން ބޭކަލުން ވަޑައިގެން އިސްލާމް ދީން ޤަބޫލު ކުރެއްވެވުމަށްފަހު ރަސޫލް (ޞޢވ) ގެ އަރިއަހުން ފުރަތަމަ އެދެނީވެސް އެމީހުންގެ ޤައުމަށް ފޮނުއްވަވައިދެއްވުމަށެވެ. ނުވަތަ ޤައުމަށް އެނބުރި ވަޑައިގަތުމުގެ ހުއްދަ ދެއްވުމަށެވެ. ކީއްވެގެންތޯއެވެ؟ ކީއްކުރައްވަންތޯއެވެ؟
ބޭނުންފުޅުވެވަޑައިގަންނަވަނީ ޤައުމުގެ މީހުންނަށް އިސްލާމް ދީނަށް ގޮވާލައްވައި އިސްލާމް ދީން މަތިވެރި ކުރެއްވެވުމަށެވެ. އިސްލާމް ދީން ކުރިއަރުވަން މަސައްކަތް ވަގުތުން ފެށްޓެވުމަށެވެ.
މީސްތަކުންނޭވެ! ލޮބުވެތި އަޚުންނާއި އުޚުތުންނޭވެ! އިސްލާމް ދީން ފެތުރުމަށާއި ނެގެހެއްޓުމަށް ކުރަންޖެހިފައިވާ މަސައްކަތްތައް މިއަދު މާ ގިނައެވެ. ސޯޝަލް މީޑިއާއަށް އެކަނި ބެލި ނަމަވެސް ކޮންމެ ދުވަހަކު އެގެންދަނީ އިސްލާމް ދީން ވިރާނާކޮށް ކަމީނާކޮށް ނައްތައިލުމަށްޓަކައި 3 މިލިއަނަށްވުރެ ގިނަ ބޮން އަޅަމުންނެވެ.
މީސްތަކުންނޭވެ! އިސްލާމް ދީން ހިމާޔަތްކުރުމާއި މަތިވެރި ކުރުމަކީ ކޮންމެ މުސްލިމެއްގެ ވެސް ބޮލުގައި އެޅިފައިވާ މަސްއޫލިއްޔަތެކެވެ. ޒިންމާއެކެވެ. އެ ޒިންމާ އަދާކުރި ގޮތަކާއިމެދު ޖަވާބުދާރީވާން ޖެހޭނެއެވެ. ދުނިޔޭގައި އެތައް އަހަރަކު އުޅެފައި މަރުވިއިރު އެކަމަށް ތިބާ ކުރި ކަމެއް ﷲ ތަޢާލާގެ ޙަޟްރަތުގައި ދަންނަވަން ޖެހޭނެއެވެ.
މިއަދު މީސްތަކުން ހީކުރަނީ ދުނިޔޭގައި އުޅުމަކީ ހަމަ އެކަނި މަސައްކަތް ކޮށްގެން އާމްދަނީ ހޯދުމަށާއި މީރުހައި ތަކެތި ކައިބޮއި ހެދުން ކަމަށެވެ. ދުނިޔަވީ އުފާތައް ހޯދުމަށް ނާޗަރަންގީ ކުޅުން ކަމަށެވެ. އިބިލީހަށް ދުންމާރި ފުމެދީ އެކަމުން އުފާ ހޯދުން ކަމަށެވެ.
މީސްތަކުންނޭވެ! މިކަންކަމާއިމެދު ފުންކޮށް ވިސްނާށެވެ! ކިތަންމެ ބުރަކޮށް މަސައްކަތް ކުރި ނަމަވެސް ދީނީ ގޮތުން އަދާކުރަންޖެހޭ މަސްއޫލިއްޔަތު އަދާ ނުކުރާނަމަ އާޚިރަތެއް ނުލިބޭނެއެވެ. އެހެންކަމުން އާޚިރަތް ހޯދަން އެދޭމީހަކު ނަމަ އެންމެ ކުރިއަށް ނެރެން ޖެހޭނީ އާޚިރަތް ހޯދަން ކުރަންޖެހޭ މަސައްކަތްތައް ކުރުމެވެ.
ބައެއް މީހުން ބުނެ އުޅެއެވެ. ތިމަންނާއަކީ ދީނީ ޢިލްމުވެރިއެއްވެސް ނޫނެވެ. އަތަކު ފައިސާއެއް ބާރެއްވެސް ނެތެވެ. ވީއިރު އިސްލާމް ދީން މަތިވެރިކުރަން އަހަރެންނަށް ކުރެވޭނީ ކޮން ކަމެއް ހެއްޔެވެ؟ މިއީ ވަރަށް ގޯސް ވިސްނުމެކެވެ. ސީދާ ޝައިޠާނާގެ ކިބައިން އަންނަ ވިސްނުމެކެވެ. އެހެނީ ކޮންމެ މީހަކަށް ވެސް ﷲ ތައާލާ ވަނީ އިޚްތިޔާރުތަކެއް ދެއްވަވައިފައެވެ. ބާރުތަކެއްވެސް ދެއްވަވައިފައެވެ.
އަމިއްލަ އަތުގައި އެއްވެސް ބާރެއް ތަނަވަސްކަމެއް ނެތް ނަމަ އެންމެ ކުޑަމިނުން ﷲ ތަޢާލާ އެންގެވި ގޮތަށް ތިމާގެ އަމަލުތައް ބަހައްޓައި މީސްތަކުންނަށް މިސާލު ދެއްކުމަކީ ވެސް އިސްލާމް ދީނަށް ނަޞްރު ދިނުމެވެ. އެވަރު ނުކުރެވޭނީ ކާކަށް ހެއްޔެވެ؟ ކީއްވެގެން ހެއްޔެވެ؟ އިސްލާމް ދީނަކީ އެންމެ ފުރިހަމަ ދީންކަމާއި ތިމާއަކީ އެދީނަށް ފުރިހަމައަށް އަމަލުކުރާ މީހެއްކަން މީސްތަކުންނަށް ދެއްކުމަކީ ކުޑަކަމެއް ކަމަށް ހީވަނީ ހެއްޔެވެ؟ ހަމަ ހިލައި އެކަން އެހެނެއް ނުވާނެއެވެ!
ނިކަން ވިސްނައިބަލާށެވެ! ރަސޫލް (ޞޢވ)ގެ ޞަހާބީންގެ ތެރެއިން މަދު ބޭކަލަކަށް ނޫނީ އިސްލާމްވެވަޑައިގެންނެވިއިރު އެއްވެސް ޢިލްމެއް ލިބިވަޑައިގެންފައެއް ނުވެއެވެ. ނަނަމަވެސް އިސްލާމް ދީން މަތިވެރިކުރައްވަވައި ދުނިޔެއަށް ފެތުރުއްވެވީ އެބޭކަލުން ނޫންތޯއެވެ؟ ވީމާ އިސްލާމް ދީން ފެތުރުމަކީ ހަމަ އެކަނި ޢިލްމްވެރިންނަށް ކުރެއްވޭނެ ކަމެއް ކަމަށް ބުނެ ނިންމައިލުމަކީ ކިހިނަކުން ކުރެވޭނެ ކަމެއް ހެއްޔެވެ؟
ރަސޫލް (ޞޢވ) ޙަދީޘްފުޅު ކުރައްވަވާފައިވަނީ ކީރިތި ޤްރްއާނުގެ އެންމެ އާޔަތެއް ނަމަވެސް މީސްތަކުންނަށް ބަޔާންކޮށްދީ ފެތުރުމަށެވެ. އެއީ ކާކަށް ނުކުރެވޭނެ ކަމެއް ހެއްޔެވެ؟ ބޭނުންވަނީ އެކަން ކުރުމުގެ ޝައުޤްވެރިކަމެވެ. ހިތްވަރެވެ.
ބައެއް ޢިލްމްވެރިން އެބަ ވިދާޅުވެއެވެ. އަހަރެންނަކީ ފާފަ ކުރެވޭ މީހެކެވެ. އެހެން މީހުންނަށް އަހަރެން މަގުދައްކާނީ ކިހިނަކުން ހެއްޔެވެ؟ މިއީވެސް ހެއްވާ ވާހަކައެކެވެ. ފާފަކުރެވޭކަން އިޙްޞާޞް ކުރެވޭނަމަ އަވަހަށް އެކަން ކުރުން ހުއްޓައިލާށެވެ.
ހަމަ ވިސްނުމުގައި ހުރެ ނިކަން ވިސްނައިލަބަލާށެވެ! އުއްބައްތި އެއް ދިއްލުމުން އެތަނުގައި ތިބި ބައަކަށް އަލިކަން ނުލިބޭ ހެއްޔެވެ؟ އެއަލިކަން ފޯރުކޮށްދެނީ އުއްބައްތި އަނދައި ހުލިވަމުން ނޫން ހެއްޔެވެ؟ ވީއިރު މިކަމުން މިސާލު ނަގައިގެން އަހަރެމެން އިންސާނުން މަސައްކަތް ނުކުރަންވީ ކީއްވެގެން ހެއްޔެވެ؟ އެހެން މީހުންނަށް މަގު ދެއްކުމުގައި އެހީތެރިވާން އަމިއްލަ ވަގުތުތައް ޤްރްބާން ނުކުރަންވީ ކީއްވެގެން ހެއްޔެވެ؟
- އިސްލާމީ ތިލަފަތުގެ ދަރުސަކުން
