ރައީސުލް ޖުމްހޫރިއްޔާ އިބްރާހިމް މުޙައްމަދު ސޯލިޙުގެ ކެބިނެޓްގައި ހިމެނިވަޑައިގަންނަވާ ވަޒީރުން އަމަލު ކުރައްވަންޖެހޭ އުސޫލުތަކާއި ސަރުކާރުގެ ފުރަތަމަ 100 ދުވަހުގެ އެޖެންޑާގައިވާ ކަންކަން ހާސިލު ކުރުމަށް ކުރައްވަންޖެހޭ ކަންކަމާއިބެހޭ މައުލޫމާތު މިއަދު ވަޒީރުންނަށް އަންގައިފިއެވެ.
މިއަދު ހެނދުނު ރައީސް އޮފީހުގައި މިކަމާއި ގުޅޭގޮތުން ވަޒީރުންނަށް މައުލޫމާތު ދެއްވުމަށް ބޭއްވި ބައްދަލުވުމުގައި ރައީސް ސޯލިހާއި ނައިބު ރައީސް ފައިސަލް ނަސީމް ވެސް ބައިވެރިވެ ވަޑައިގެންނެވިއެވެ.
ރައީސް އޮފީހުން މައުލޫމާތު ދީފައިވާ ގޮތުގައި، ސަރުކާރުގެ ފުރަތަމަ 100 ދުވަހުގެ ތެރޭގައި ހާސިލު ކުރުމަށް އެޖެންޑާ ކުރެވިފައިވާ ކަންކަން ކުރިއަށްގެންދާނެ ގޮތްތަކާއި ބެހޭ ގޮތުން ވެސް މިބައްދަލުވުމުގައި ވާހަކަ ދައްކާފައިވެއެވެ. އަދި އެކަންކަން ހާސިލުކުރުމަށް ކުރަންޖެހޭ މަސައްކަތްތައް ވީހާވެސް އަވަހަށް ފެށްޓެވުމަށާއި އެކަމެއް ނިންމުމަށް ކަނޑައެޅިފައިވާ ތާރީޚަށް ނިންމެވުމާއި ބެހޭ ގޮތުން ވެސް މަޝްވަރާ ކޮށްފައިވާ ކަމަށް މައުލޫމާތު ލިބިފައިވެއެވެ.
މީގެ ކުރިން ވެސް ރައީސް ސޯލިހު ވަނީ، ކޮރަޕްޝަންގެ އަމަލުތަކާއި ދުރުވެތިބުމަށް ވަޒީރުންނަށް އިލްތިމާސް ކުރައްވާފައެވެ.
ރައީސް އިބްރާޙިމް މުޙައްމަދު ސޯލިހުގެ ސަރުކާރުން ވަނީ ފުރަތަމަ 100 ދުވަހުގެ ތެރޭގައި ވަރަށް ގިނަ ކަންކަން ކުރައްވަން ނިންމަވާފައެވެ. އޭގެ ތެރެއިން ބައެއް ވައުދުތައް މިހާރުވެސް މިނިސްޓްރީ ތަކުން ދަނީ ފުއްދަމުންނެވެ.
