އުތުރު ކޮރެއާގެ ތެޔޮ ޓޭންކަރަކާއެކު ކަނޑުމަތިން މުއާމަލާތްތަކެއް ހިންގި، ރާއްޖޭގައި ރަޖިސްޓްރީ ކޮށްފައިވާ ކަމަށް ބުނާ ތެޔޮ ޓޭންކަރުގެ މައްސަލާގައި ފުލުހުން ހައްޔަރު ކުރި އަބްދުﷲ ފަހުމީ ޝަރީއަތް ނިމެންދެން ބަންދުގައި ބަހައްޓަން ޖުލައި މަހު ކްރިމިނަލް ކޯޓުން ކުރި އަމުރު ހައި ކޯޓުން މިއަދު ބާތިލްކޮށް، އޭނާ މިނިވަން ކޮށްފިއެވެ.
މިއަހަރުގެ މާރޗް މަހުގެ ތެރޭގައި ފެންމަތިވި އެމައްސަލައިގައި ފަހުމީ ހައްޔަރުކޮށް ބަންދުގައި ބެހެއްޓުމަށްފަހު، މެއި މަހު އޭނާ ދޫކޮށްލިއެވެ. ނަމަވެސް އޭނާގެ މައްޗަށް ކުރާ ޓެރަރިޒަމްގެ ދައުވާގެ އިބްތިދާއީ އަޑުއެހުމުގައި، ކްރިމިނަލް ކޯޓުން އަމުރުކޮށްފައިވަނީ އެމައްސަލައިގެ ޝަރީއަތް ނިމެންދެން ފަހުމީ ބަންދުގައި ބަހައްޓާށެވެ.
ފަހުމީގެ ޝަރީއަތް ނިމެންދެން އޭނާގެ ބަންދުގައި ބަހައްޓަން ކްރިމިނަލް ކޯޓުން އަމުރު ކުރީ، ބައެއް ހެކިންނަށް ބިރު ދެއްކި ކަމަށް ދައުލަތުން ތުހުމަތުކޮށް، ބަންދުގައި އޭނާ ބަހައްޓަން އަމުރު ކޮށްދިނުމަށް ވެސް އެދުމުންނެވެ.
ފުޅާ ދާއިރާއެއްގައި ތެލުގެ ވިޔަފާރި ރާއްޖެއިން ބޭރުގެ އެކި ފަރާތްތަކާއި ގުޅިގެން ކުރަމުންދާ ފަހުމީގެ މައްޗަށް ދައުލަތުން ގިނަ ތުހުމަތުތަކެއް ކުރާއިރު އޭނާގެ މައްޗަށް ޓެރަރިޒަމްގެ ދައުވާ ވެސް ވަނީ ކޮށްފައެވެ. އެދައުވާ ސާބިތު ވެއްޖެނަމަ އޭނާގެ މައްޗަށް 17-20 އަހަރާއި ދެމެދުގެ ޖަލު ހުކުމެއް އަންނާނެއެވެ.
