އަސްކޮއި ގްރޫޕު މެދުވެރިކޮށް އުމުރާއަށް ދާން އުޅުނު 50 މީހަކަށް ވަގު ޓިކެޓް ވިއްކި ކުންފުނީގެ ވެރި މީހާ ލަންކާއަށް ފުރަން އުޅެނިކޮށް ހައްޔަރުކޮށްފި އެވެ. އޭނާ ހައްޔަރުކޮށްފައިވަނީ އައްޑޫން ފުރަން އުޅެނިކޮށް ކަމަށް ވަނީ މައުލޫމާތު ލިބިފައެވެ.
ފުލުހުންގެ މީޑިއާ އޮފިޝަލް ވިދާޅުވީ އެކަމުގެ މައުލޫމާތު ހޯދަމުން ގެންދާ ކަމަށެވެ. އެމީހުންނަށް ވިއްކާފައިވަނީ ވަގު ޓިކެޓްކަން އެނގިފައިވަނީ އިއްޔެ ފުރަން އެއާޕޯޓަށް ދިއުމުންނެވެ. އެހެންކަމުން އެމީހުންނަށް އިއްޔެ ވަނީ ނުފުރިފައެވެ. ގްރޫޕުން ބުނެފައިވަނީ އެމީހުން ފުރުވާލުމުގެ ކަންކަން ހަމަޖައްސަމުން ގެންދާ ކަމަށެވެ. މީގެ ކުރިން މަކަރު ހަދަމުން އައީ ބައެއް ގްރޫޕުތަކުންނެވެ.
އެގޮތުން ބައެއް ގްރޫޕުތަކަށް ޙައްޖަށް ދިއުމަށް ފައިސާ ދެއްކި ގިނަ އަދަދެއްގެ މީހުންނަށް ގްރޫޕުތަކުން ވަނީ މަކަރުހަދައިފައެވެ. އެއިގެ ތެރެއިން ބައެއް މީހުން މިހާރުވަނީ ސަރުކާރުން ހައްޖަށް ފޮނުވައިފައެވެ. އެތައް އަހަރުތަކެއް ފާއިތުވީ އިރުވެސް އަދިވެސް ޙައްޖަށް ނުދެވޭ ގިނަ ބައަކު ތިބިކަންވެސް ފާހަގަކުރެވެއެވެ. މިފަހަރު މިދިމާވި މައްސަލަ އާއި ގުޅިގެން ގްރޫޕުތަކުން ޓިކެޓް ނެގުން ފަދަ ކަންކަން ކުރާއިރު ހަމައެކަނި އަގަށް ނުބަލައި އިތުބާރަށްވެސް ބަލަންޖެހިފައިވާކަން ވަނީ ފާހަގަކުރެވިފައެވެ.
