އަސްކޮއި އުމްރާ ޖަމާއަތުގެ ފަރާތުން މިއަދު ފުރަން ދިޔަ 50 މީހަކަށް ވަގު ޓިކެޓްތަކެއް ވިއްކާފައިވާތީ، އުމްރާއަށް ފުރޭގޮތް ނުވެ ތާށިވެއްޖެއެވެ.
މިކަމާއި ގުޅޭގޮތުން މައުލޫމާތު ދެއްވަމުން އެޖަމާއަތުގެ އޮފިޝަލަކު ވިދާޅުވީ، ޝްރީލަންކަން އެއާލައިނުން ފުރަން ހަމަޖެއްސި 50 ވަރަކަށް މީހުންނަށް، ނުފެރޭނެކަން އެނގުނީ ފުރަން އެމީހުން އެއާޕޯޓަށް ދިޔަ ފަހުން ކަމަށެވެ.
"މައްސަލަ ޕޮލިހަށް ހުށަހަޅައިގެން ބަލަމުންދަނީ. އަޅުގަނޑުމެން ޓިކެޓު ނެގި ފަރާތުން އެންމެ ފަހު ވަގުތާއި ހަމައަށްވެސް ބުނެފައިވަނީ ފުރޭނެ ކަމަށް. ފުރަން އެއާޕޯޓަށް ގޮސް ތިއްބާ ނުފުރޭނެކަން އެނގުނީ" އަސްކޮއި ޖަމާއަތުގެ އޮފިޝަލަކު ވިދާޅުވިއެވެ.
މިމައްސަލަ މިހާރު ޕޮލިހަށް ހުށަހަޅާފައިވާތީ، އަސްކޮއި ގްރޫޕުން ޓިކެޓު ނަގާފައިވަނީ ކޮން ފަރާތަކުން ކަމެއް ހާމަ ކޮށްފައެއް ނުވެއެވެ.
އަސްކޮއި އުމްރާ ޖަމާއަތުން ބުނީ، އެޖަމާއަތުގެ ފަރާތުން އުމްރާއަށްދާ ފަރާތްތައް ދެން އެންމެ އަވަހަށް ޓިކެޓް ލިބޭނެ ދުވަހެއް ބަލާ، އެމީހުންނާއި މަޝްވަރާތައް މިހާރުވެސް ކުރަމުންދާ ކަަމަށެވެ.
މިއަހަރުގެ ފަހު އުމްރާއަށް އެކިއެކި ޖަމާއަތްތަކުގެ ހަވާލުގައި ގިނަ ބަޔަކު ވަނީ މިހަތަރު ދުވަހުގެ ތެރޭގައި ފުރާފައެވެ.
