ރައްޔިތުންގެ މަޖިލީހުގެ ވިލިނގިލީ ދާއިރާގެ މެމްބަރު ސައުދު ހުސެއިނާއި އެޑިއުކޭޝަން މިނިސްޓްރީގެ ކުރީގެ ޑެޕިއުޓީ މިނިސްޓަރ އިބްރާހިމް ހަނީފަށް ދައުލަތުން ކުރި ޓެރަރިޒަމްގެ ދައުވާ ކްރިމިނަލް ކޯޓުން މިއަދު ބޭރުކޮށްލައިފިއެވެ.
ސައުދާއި ހަނީފްގެ މައްޗަށް ޓެރަރިޒަމްގެ ދައުވާ ކޮށްފައިވަނީ ހައިކޯޓުގެ ފަނޑިޔާރު ޝުޖާއު އުސްމާނު އަވަހާރަކޮށްލަން ރޭވިކަމުގެ ތުހުމަތުގައެވެ. ނަމަވެސް ކްރިމިނަލް ކޯޓުން އެދައުވާ ބޭރުކޮށްލީ އެމައްސަލަ އަކީ މަދަނީ މިންގަނޑުން ކުރިއަށް ނުގެންދެވެނެ ދައުވާއެއް ކަމަށް ބުނެފައެވެ.
މިކަމާއި ގުޅޭގޮތުން އެމްޕީ ސައުދު މިއަދު ކުރެއްވި ޓްވީޓެއްގައި ވިދާޅުވީ ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ އަނިޔާވެރި ސަރުކާރުން އޭނާގެ މައްޗަށް އުފައްދާފައިވަނީ އަސްލެއް ނެތް ޓެރަރިޒަމްގެ ސިޔާސީ ދައުވާއެއް ކަމަށެވެ.
ސައުދުގެ ވަކީލުން ކުރިން ވިދާޅުވީ އެދެބޭފުޅުންގެ މައްޗަށް ދައުވާ ކުރީ އެއްވެސް ހެއްކަކަށް ބިނާކޮށްފައި ނޫން ކަމަށާއި ހަމައެކަނި ދައުވާ ކުރީ ދެ މީހަކު ދެއްކި ވާހަކައަކަށް ބިނާކޮށް ކަމަށެވެ.
އެހެންކަމުން މިމައްސަލައިގެ އިބްތިދާއީ އަޑުއެހުމުގައި ވަކީލުން ވަނީ، އެދައުވާއަކީ ޓެރަރިޒަމްގެ ގާނޫނުގައި ބުނާ މިންގަނޑަށް ފެތޭ ދައުވާއެއް ނޫން ކަމަށް ކަނޑައަޅައި ދިނުމަށް އެދިވަޑައިގެންފައެވެ.
