އަމަނާތަކަފުލް މޯލްޑިވްސްއިން ދެމުންގެންދާ ތަކަފުލް ހިދުމަތްތައް މޯލްޑިވްސް އިސްލާމިކް ބޭންކްގެ ހުރިހާ ގޮފިތަކުން ލިބޭނެ ގޮތް ހެދުމަށް "ބޭންކާ ތަކަފުލް” މި ނަމުގައި ޙާއްސަ ޚިދުމަތެއް ތަޢާރަފްކޮށްފިއެވެ.
މި ޚިދުމަތް ފެށުމަށް ދެ ކުންފުނިން ސޮއެކޮށްފައި ވަނީ މާގިރި ހޮޓަލޔގައި ބޭއްވި ހަފްލާއެއްގައި އެވެ. މި އެއްބަސްވުމުގައި އަމަނާ ތަކަފުލްގެ ފަރާތުން ސޮއިކުރެއްވީ ސީއީއޯ ހަރީޒް ސުލައިމާނެވެ. އަދި އިސްލާމިކް ބޭންކުގެ ފަރާތުން ސޮކުރެއްވީ އެކްޓިންގ ސީއީއޯ އަހުމަދު ރިޒާއެވެ.
މީޑިއާތަކަށް މައުލޫމާތުދެއްވަމުން އިސްލާމިކް ބޭންކުގެ އެކްޓިންގ ސީއީއޯ އަހުމަދު ރިޒާ ވިދާޅުވި ގޮތުގައި، "ބޭންކާ ތަކަފުލް" މި ހިދުމަތަކީ ރާއްޖޭގެ މުޅިން އަލަށް ފަށާ ހިދުމަތެކެވެ. އަދި މި ހިދުމަތުގެ ދަށުން އަމަނާ ތަކަފުލްގެ ތަކަފުލް ހިދުމަތްތައް އެ ބޭންކުގެ ހުރިހާ ގޮފިތަކުން ލިބިގެންދާނެ ކަމަށް އޭނާ މައުލޫމާތު ދެއެވެ.
މީގެ އިތުރުން، ބޭންކާތަކަފުލް ފޯރުކޮށްދިނުމުގެ މައިގަނޑު މަގްސަދަކީ އެމްއައިބީގެ ކަސްޓަމަރުންނަށް ފަސޭހަކަމާއެކު އެއް ފުރާޅެއްގެ ދަށުން އިސްލާމިކް ފައިނޭންސް ނުވަތަ އިސްލާމިކް މާލީ ހިދުމަތްތައް ލިބިގެންދިޔުންކަމަށް ވެސް ރިޒާ ވިދާޅުވިއެވެ.
ހަމައެހެންމެ، އަމަނާ ތަކަފުލްގެ ސީއީއޯ ހަރީޒް ސުލައިމާން ވިދާޅުވީ، މި އެއްބަސްވުމުގެ ދަށުން ތަކަފުލްގެ ހުރިހާ ހިދުމަތްތަކެއް އިސްލާމިކް ބޭންކުގެ ހުރިހާ ގޮތްޕެއް މެދުވެރިކޮށް ލިބެމުންދާއިރު، މިކަމުގެ ސަބަބުން ކަސްޓަމަރުންނަށް ވަރަށް ގިނަގުނަ ފައިދާތަކެއް ލިބިގެންދާނެ ކަމަށެވެ.
އިސްލާމިކް ބޭންކުން ބުނި ގޮތުގައި، ''ބޭންކާ ތަކަފުލް'' މި ހިދުމަތް އެ ބޭންކުގެ މާލެ، ހުޅުމާލެ، އައްޑޫ ސިޓީ ހިތަދޫ އަދި ފުވައްމުލަކު ގޮފިން ލިބިގެންދާެނެއެވެ.
