ރާއްރާއްޖޭގައި އިތުރު 140 ރިސޯޓެއް ތަރައްގީ ކުރުމުގެ މަސައްކަތް ކުރަމުން އަންނަ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެ އެވެ.
އިއްޔެ ޓޫރިޒަމް މިނިސްޓްރީގައި ނޫސްވެރިންނަށް ބޭއްވި ޙާއްސަ ބައްދަލުވުމެއްގައި މިނިސްޓަރު އަލީ ވަހީދު ވިދާޅުވީ، ރިސޯޓް ތަރައްގީ ކުރުމުގެ މަޝްރޫޢުގެ ތެރެއިން 140 ރިސޯޓެއްގެ މަސައްކަތް މިހާރު ކުރިއަށް ދާ ކަމަށެވެ.
ނަމަވެސް، މިނިސްޓަރު އިތުރަށް ވިދާޅުވީ ބައެއް ސަބަބުތަކާއި ހުރެ، ތިރީސް ހަތަރު ރިސޯޓެއްގެ މަސައްކަތް މެދުކެނޑިފައިވާ ކަމަށެވެ.
ޖުމްހޫރީ ޕާޓީގެ ރައީސް އަދި ޓޫރިޒަމް މިނިސްޓާރ އަލީ ވަހީދު ވިދާޅުވީ، މި ސަރުކާރުން މަސައްކަތް ކުރާނީ ރާއްޖޭގައި އެންމެ ބޮޑު އާމްދަނީއެއް ލިބޭ އެއް ދާއިރާ ކަަމަށްވާ، ޓޫރިޒަމް އިތުރަށް ކުރިއެރުވުމަށް ކަމަށެވެ.
ރިސޯޓްތަކުގެ އިތުރުން ޓޫރިސްޓުންނަށް ޚާއްސަ ބާރަ ހޮޓަލާއި 508 ގެސްޓްހައުސްގެ ހިދުމަތް ދެ އެވެ. އޭގެ އިތުރުން 148 ސަފާރީ އާއި 308 ޓްރެވެލް އޭޖެންސީ އާއި 272 ޑައިވް ސްކޫލް ރަޖިސްޓްރީކޮށްފައިވާ ކަމަށް ވެސް ޓޫރިޒަމް މިނިސްޓްރީން ވަނީ އާއްމުކޮށްފައި އެވެ.
މިނިސްޓަރު އަލީ ވަހީދު ވިދާޅުވި ގޮތުގައި ޓޫރިޒަމަށް ހާއްސަކޮށްގެން ތޭރަ ރަށާއި ހަތަރު ފަޅެއްގެ އިތުރުން ދެ ބިން ގެޒެޓްކޮށް، އެއްވެސް ބަޔަކަށް މިހާތަނަށް ދޫނުކޮށް އެބަ އޮތެވެ.
