އިސްލާމިކް މިނިސްޓްރީ އަބަދުވެސް ވާނީ ޢިލްމްވެރިންނާއެކުގައި ކަމަށާއި ޢިލްމްވެރިންނަށް ދިމާވާ ކޮންމެ ކަމެއްގައިވެސް އިސްލާމިކް މިނިސްޓްރީން އެހީތެރިވެދޭނެ ކަމަށް މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީ ވިދާޅުވެއްޖެއެވެ.
މިނިސްޓަރ ޑރ. އަހްމަދު ޒާހިރު މިމޭރުމުން ވިދާޅުވީ ދިވެހިރާއްޖޭގެ ޢިލްމްވެރިންނާއި ބައްދަލުކުރައްވަން ރޭ އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވެވި މިބައްދަލުވުމުގައެވެ.
ދިވެހިރާއްޖެގައި މިވަގުތު ތިއްބެވި ގިނަ އަދަދެއްގެ ޢިލްމުވެރިން ބައިވެރިވެވަޑައިގެންނެވި މި ބައްދަލުކުރެއްވުމުގައި މިނިސްޓަރ އޮފް ޑރ. އަޙްމަދު ޒާހިރު ވިދާޅުވީ މިނިސްޓްރީގެ އެންމެ މުހިންމު މަސައްކަތަކަށްވާނީ ދީނީ ޢިލްމުވެރިންގެ ލަފާއާ އިރުޝާދާއެކު ދިވެހިރާއްޖޭގެ ދީނީ ކަންކަން ރަގަޅުކުރުން ކަމަށެވެ.
މި ބައްދަލުވުމުގައި ދީނީ ކަންކަން ކުރިއެރުވުމަށްޓަކައި ކުރެވިދާނެ މަސައްކަތްތަކާ ގުޅޭގޮތުންވަނީ ޢިލްމްވެރިންގެ ހިޔާލުފާޅު މިނިސްޓަރަށް އަރުވައިފައެވެ. މިއީ އިސްލާމިކް މިނިސްޓަރުގެ ހައިސިއްޔަތުން ޑރ. އަޙްމަދު ޒާހިރު ޢަލީ ޢިލްމްވެރިންނާ ބައްދަލުކުރެއްވި ފުރަތަމަ ފަހަރެވެ. އިސްލާމިކް މިނިސްޓަރކަމުގެ މަޤާމާ ހަވާލުވެވަޑައިގަތުމަށްފަހު މިނިސްޓަރ ޑރ. އަޙްމަދު ޒާހިރު ޢަލީ ވަނީ މިނިސްޓްރީ އާއި މިނިސްޓްރީގެ ބެލުމުގެ ދަށުން ހިނގާ މުއައްސަސާތަކުގެ މުއައްޒަފުންނާ ބައްދަލުކުރައްވައިފައެވެ.
