އިސްލާމް ދީނުގެ މިންތަކާއި އިންތައް ބާވައިލެއްވެވީ ﷲ ތަޢާލާ އެވެ. ވީމާ ތިމަންނަ މިއުޅެނީ މެދުމިނު މުސްލިމަކަށް ވުމަށް ކަމަށް ބުނެ ﷲ ތަޢާލާ ބާވައިލެއްވެވި މިންތަކާއި އިންތަކުން ބޭރެއް ނުވެވޭނެއެވެ. މިސާލަކަށް ﷲ ތަޢާލާ ޙަރާމް ކުރައްވަވާފއިވާ އެއްވެސް ކަމެއް ހުއްދައެއް ނުކުރެވޭނެއެވެ. އަދި ހުއްދަ ކުރައްވަވާފައިވާ ކަމެއް ހަރާމެއްވެސް ނުކުރެވޭނެއެވެ.
ﷲ ތަޢާލާގެ އިންތައް ބަލަން ޖެހޭނީ ކީރިތި ޤްރްއާނާއި ރަސޫލް (ޞޢވ) ގެ ސުންނަތުންނެވެ. އެކަން ޔަޤީންކުރަން ބޭނުންމީހާއަށް ކީރިތި ޤްރްއާނުގެ އާޔަތްތަކުން ދަލީލު ލިބޭނެއެވެ. އެއަށްވުރެ ތިލަ ކުރަން ބޭނުން މީހާއަށް "ތިމަން ރަސޫލާ (ޞޢވ) މިވަޑައިގަންނަވަނީ ތިއަބައިމީހުންނަށް 2 އެއްޗެއް ދޫކުރައްވައިފައެވެ. އެއީ ކީރިތި ޤްރްއާނާއި ތިމަން ރަސޫލާ (ޞޢވ)ގެ ސުންނަތެވެ. އެއިގައި ބާރަށް ހިފަހައްޓާށެވެ. ތިއަބައި މީހުން ގެއްލެނިވެގެނެއް ނުދާނެއެވެ" މި ޙަދީޘްފުޅުން ފުދޭނެއެވެ.
މިހައި ސާފުކޮށް އެނގެން އޮތް ކަމެއްގައި މިއުޅެނީ މެދުމިނު މުސްލިމަކަށް ވުމަށް ކަމަށް ބުނެ ކީރިތި ޤްރްއާނާއި ޙަދީޘްފުޅުތަކުގެ ބޭރުން އިސްލާމް ދީނަށް ވެއްދޭނީ ކޮން އިތުރު ކަންތައްތަކެއް ހެއްޔެވެ؟ ހަމަ އެންމެ ކަމެއްވެސް ނުވެއްދޭނެއެވެ. ދަންނަ ބޭކަލުންގެ އިޖުމާޢުވެސް އޮތީ އިސްލާމް ދީނުގައި ނެތް ކަންތައްތަކެއް ބޭރުން ގެނެސް ވެއްދުމަކަށް ނޫނެވެ. ހަމަ އެފަދައިން އިސްލާމް ދީނުގައި ބަޔާންވެގެންވާ އެއްވެސް ޙުކުމެއް އިސްލާމް ދީނުން ބޭރުކުރާކަށްވެސް ނޫނެވެ. މި ދެކަމުން ކުރެ އެއްވެސް ކަމެއް ކުރުމުގެ އެއްވެސް ބާރެއް ހަމަ އެއްވެސް ފަރާތަކަށް ލިބިގެނެއް ނުވެއެވެ. ނުވެސްވާނެއެވެ.
އިސްލާމް ދީނުގައި ހައްދުފަހަނައަޅައި ދިއުމެއް ނެތް ކަމަށް ބުނެވޭ ބަހުގެ މާނަވެސް އޮޅުވައި ނުލާށެވެ. ރަނގަޅު ވާހަކައެކެވެ. އިސްލާމް ދީނުގައި ހައްދުފަހަނައަޅައި ދިއުމެއް ނެތެވެ. އެބަހުގެ މާނައަކީ މިސާލަކަށް ތިމާ ކުރާ ހަމައެކަނި ކަމަކީ އަޅުކަން ކުރުން ކަމަށް ހެދުމެއް ނެތެވެ. އެއީ ހައްދުފަހަނައަޅައި ދިއުމެވެ. އެހެނީ އިސްލާމް ދީނުގައި އޮތީ ނަމާދުން އަވަދިވުމުން އަވަހަށް ދިރިއުޅެން ކުރާ މަސައްކަތަށް ފަށައިގަތުމެވެ.
މިބަހުގެ މާނަވެސް އޮޅުވައި ނުލާށެވެ! ނަމާދުން އަވަދިވުމުން އަވަހަށް މަސައްކަތަށް އެނބުރޭށެވެ. އޮތް ބަހުގެ މާނައަކީ ސަލާމް ދިނުމާއިއެކު ފުންމައިގެން ތެދުވެ ދުއްވައިގަންނަ ވާހަކައެއް ނޫނެވެ. ނަމާދުގެ ފަހުން ކިޔާ ޛިކްރް ތަސްބީޙަ ކިޔުމާއި ރަވާތިބު ސުންނަތް ކުރުމާއި ވަގުތު އޮތްވަރަކުން ކީރިތި ޤްރްއާން ކިޔެވުމާއި ޛިކްރްކުރުމަކީވެސް ކުރަންޖެހޭ ކަންކަމެވެ.
މުސްލިމުންނަށް ހެޔޮ އަމަލުތައް ކުރަން ހިތްވަރުދޭން ވާނެއެވެ. ހަނދާންކޮށްދޭން ވެސް ވާނެ އެވެ. ނަމަވެސް އިސްލާމް ދީނުގެ ކަންކަމަށް ދައުވަތު ދިނުމަކީ މީހުންނާއި ޒުވާބުކޮށް އަރާރުން ވުމެއްވެސް ނޫނެވެ. ހަމައެފަދައިން އިސްލާމް ދީން ޤަބޫލުކުރުމަށް ކާފަރުންނަށް ދައުވަތުދޭން ވެސް ވާނެއެވެ. ދައުވަތު ދިނުމުގައިވެސް މަޑުމައިތިރިވެ ޙިކްމަތް ބޭނުންކުރަންވާނެއެވެ. ދައުވަތު ޤަބޫލު ނުކުރުމުން އެމީހާގެ ބޯކަނޑައިލުމެއް ނެތެވެ.
އަދިވެސް ވިސްނާށެވެ! ބައެއް އަންހެނުން އައުރަ ނިވާ ނުކޮށް އެބަ އުޅެއެވެ. މެދުމިނު މުސްލިމަކަށްވުމުގެ ނަމުގައެވެ. އިސްލާމް ދީނުގައި ބަޔާންވެގެންވާ އެއްވެސް ކަމަކަށް އަމަލު ނުކުރުމަކީ މެދުމިނަށް ތަބައަވުމެއް ނޫނެވެ. މެދުމިނަކީ އިސްލާމް ދީނުގައި ބަޔާންވެގެންވާ މިންތަކާއި އިންތަކެވެ. އެ އިންތަކުން ބޭރުވުމަކީ ހައްދުފަހަނައަޅައި ދިއުމެވެ. އެ އިންތަކުގައި ވަރުގަދައަށް ހިފެހެއްޓުމަކީ މެދުމިނުގައި ހިފެހެއްޓުމެވެ.
ނަމާދު ބަރާބަރަށް ކުރުމަކީ މެދުމިނެވެ. ނަމާދު އެޅުމަކީ އަދި އެހެންވެސް ފަރުޟެއް އަދާ ނުކުރުމަކީ ހައްދުފަހަނައަޅައި ދިއުމެވެ. އަދާކުރަންޖެހޭ މަސްއޫލިއްޔަތު އަދާ ނުކުކުރުމަކީ ހައްދުފަހަނައަޅައި ދިއުމެވެ.
މިނޫން ގޮތަކަށް މެދުމިން ބަޔާން ކުރެވޭނެ އެއްވެސް ހަމައެއް އިސްލާމް ދީނުން ފެންނާކަށް ނެތެވެ. ކީރިތި ޤްރްއާނާއި ސުންނަތުގައި ނެތުމުންނެވެ.
- އިސްލާމީ ތިލަފަތުގެ ދަރުސަކުން
