މާލޭގެ މަގުތަކާއި އާންމުން ބޭނުންކުރާ ފަޅުގެ ސަރަޙައްދުތައް މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާ މިއަދު ބައްލަވާލައްވައިފިއެވެ.
މިކަމާއި ގުޅޭގޮތުން މައުލޫމާތު ދެއްވަމުން ޓްރާންސްޕޯޓް މިނިސްޓްރީގެ އޮފިޝަލަކު ވިދާޅުވީ މާލޭގެ މަގުތަކާއި ބަނދަރު ސަރަޙައްދު އޮތް ގޮތާއު އެތަންތަނުގެ ހާލަތު މިނިސްޓަރ ބައްލަވާލައްވަނީ ރައްޔިތުން ބޭނުންވާ ހައްލުތަކަކީ ކޮބައިތޯ އެކަމަނާ އަމިއްލަފުޅަށް ދެނެގަނެ ރައްޔިތުންނަށް ދަތިވާ ގޮތަށް ހުރި ކަންކަމަށް ހައްލު ހޯއްދަވައި ދެއްވުން އަވަސް ކުރުމުގެ ގޮތުން ކަމަށެވެ.
މިނިސްޓަރ އައިޝަތު ނަހުލާގެ އެޒިޔާރަތުގައި އެކަމަނާ ވަނީ ބައެއް އާންމުންނާއި ވެސް ސުވާލުކޮށް، ދަތިވާ ކަންކަން އޮޅުންފިލުއްވާފައެވެ.
މީގެއިތުރުން މިޒިޔާރަތުގައި އެކަމަނާވަނީ ފުލުހުންގެ ޓޯޔާޑަށާއި، ލޯކަލް މާރުކޭޓް ސަރަހައްދަށާއި، މާލޭގައި ހުންނަ ވިލިނގިލި އަދި ހުޅުމާލެ ފެރީ ޓަރމިނަލް ސަރަހައްދުގައި ހަދާފައިވާ ޕާކް ކުރާ ސަރަޙައްދަށާއި، މަޖީދީ މަގުގައި ޕާކް ކުރަން ހަދާފައިވާ ހީނާމާގެ ސަރަޙައްދަށް ވެސް ވަޑައިގެންފައެވެ.
މާލޭގެ އުތުރު ފަރާތު ބަނދަރު ސަރަޙައްދަށް ވެސް ވަޑައިގެން، އެސަރަޙައްދުގައި ހުރި ބައެއް ފަޅުއޮޑިތަކަށް އަރުއްވާ ފަޅުވެރިންނަށް ބަނދަރު ބޭނުން ކުރުމުގައި ދިމާވާ ދަތިތަކާ ގުޅޭގޮތުން ވެސް މިނިސްޓަރ އައިޝަތު ނަހުލާ ވަނީ ސުވާލު ކުރައްވާފައެވެ.
މިޒިޔާރަތްތަކުގައި މިނިސްޓަރާއިއެކު ޓްރާންސްޕޯޓް އޮތޯރިޓީގެ ޑެޕިއުޓީ ޑިރެކްޓަރ ޖެނެރަލް މުޙައްމަދު ރަފީއު އާއި ފުލުހުންގެ ޓްރެފިކް ޑިޕާޓްމެންޓްގެ ހެޑް ޙުސެއިން ސަމީރާއި ފުލުހުންގެ ޓްރެފިކް އޮޕަރޭޝަން ޔުނިޓުގެ ހެޑް މުޙައްމަދު ލުތުފީ ވެސް ބައިވެރިވެ ވަޑައިގެންނެވިއެވެ.
