ޓޫރިޒަމް މިނިސްޓްރީގައި ރައްޔިތުންނަށް ބަންދުކުރެވިފައިވާ ތަންތަން ކުރިން ހުރި ނަމަވެސް ޓޫރިޒަމް މިނިސްޓްރީގެ ހުރިހާ ދޮރުތަކެއް މިހާރު ވަނީ ރައްޔިތުންނަށް ހުޅުއްވާލައްވާފައިވާ ކަމަށާއި ސިއްރުކުރަންޖެހޭ އެއްވެސް ކަމެއްނެތް ކަމަށް އަދި ޓޫރިޒަމް މިނިސްޓަރަކީ މާ ބާރުގަދަ މިނިސްޓަރެއް ކަމަށް ޤަބޫލުފުޅު ނުކުރައްވަވާ ކަމަށް ޓޫރިޒަމް މިނިސްޓަރު ޢަލީ ވަޙީދު ވިދާޅުވެއްޖެއެވެ.
މިނިސްޓްރީ އާއި ޙަވާލުވެވަޑައިގަތުމަށްފަހު ބޭއްވެވި ފުރަތަމަ ނޫސްވެރިންގެ ބައްދަލުވުން މިއަދު ހަވީރު މާފުށީގައި ކުރިއަށް ގެންދަވަމުން ޢަލީ ވަޙީދު ވިދާޅުވީ މިނިސްޓްރީގެ މަސައްކަތްތައް ކުރިއަށް ގެންދަވާނީ ރައީސް އިބްރާހީމް މުޙައްމަދު ޞާލިޙްގެ ސަރުކާރާއިއެކު ރައްޔިތުން ކުރަމުން އަންނަ އުންމީދީ ހެޔޮ ބަދަލުތަކާއި އެއްގޮތަށް ކަމަށެވެ.
ޢަލީ ވަޙީދު ވިދާޅުވީ މިނިސްޓަރުކަމުގައި ފާއިތުވި ފުރަތަމަ ހަފްތާ ނިމިގެންދިއައިރު ދާއިރާގެ ބައިވެރިންނާއި ބައްދަލު ކުރައްވައި ވާނީ ޚިޔާލު ހޯއްދަވާފައި ކަމަށެވެ. އަދި މީގެ ފަހުން އެ މިނިސްޓްރީން މައުލޫމާތެއް އޮޅުންފިލުވަން ބޭނުންވާ މީޑިއާތަކަށްވެސް އަދި ރައްޔިތުންނަށް ވެސް އެފަރާތަކުން ބޭނުންވާ ކޮންމެ މައުލޫމާތެއް ފޯރުކޮށްދޭނެ ކަމަށެވެ.
ޢަލީ ވަޙިދު ވިދާޅުވީ ޓޫރިޒަމް މިނިސްޓަރީ އަކީ ރައްޔިތުންނާއި ވަރަށް ބޮޑަށް ގުޅުން ހުރި ދައުލަތުގެ ރައުސުލްމާލެއް ކަމަށާއި އެމިނިސްޓްރީން ކުރާ ކަންކަމަށް ރައްޔިތުން ނުކުމެ ޖަވާބުދާރީ ކުރުވަން ޖެހޭނެ ކަމަށެވެ. "މިހާރުވެސް އަޅުގަނޑު ވާނީ އޭސީސީ އާއި ބަދަލުކޮށް މިނިސްޓްރީން ކުރާ ކަންކަމަށް ފާރަވެރިވެ ޖަވާބުދާރީ ކުރުވައި ދިނުމަށް އެދިފަ.!"
އަލީ ވަޙީދު ވިދާޅުވީ ޓޫރިޒަމް މިނިސްޓްރީގެ ތެރެއަށް ސިޔާސީ އެއްވެސް ނުފޫޒެއް ނުވަންނާނެ ކަމަށާއި އެމިނިސްޓްރީގެ ޚިދުމަތް ހުރިހާ އެންމެންނަށް ހަމަހަމަކަމާއިއެކު ލިބެމުންދާނެ ކަމަށެވެ. އަދި މިނިސްޓްރީން ފޯރުކޮށްދޭ އެއްވެސް ޚިދުމަތަކުން ކުރިއެރުމެއް ލިބިއްޖެ ނަމަ އެއީ ރައްޔިތުންނަށް ލިބޭނެ ކުރިއެރުމެއް ކަމަށާއި އެކަމުގެ ފައިދާ ކުރާނީ ރައްޔިތުންނަށް ކަމަށެވެ. އަދި ހުރިހާ ކަމެއްވެސް ޤާނޫނުތަކާއި ޤަވާއިދުތަކާއި އެއްގޮތަށް ކުރިއަށް ގެންދެވުމަކީ އެމަނިކުފާނުގެ ޒިންމާއެއް ކަމަށާއި އެއްވެސް ކަމެއް ގޯސްކޮށް ހިނގައްޖެނަމަ އެކަމުގެ ޒިންމާ އުފުއްލަވާނެ ކަމަށެވެ.
