ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ހައްޔަރުކުރި އެމްޑީޕީގެ ކުރީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު (64އ)، ތަހުގީގަށް 30 ދުވަހުގެ މުއްދަތަކަށް ބަންދުގައި ބެހެއްޓުމަށް ކޯޓުން މިއަދު އަމުރުކޮށްފިއެވެ.
ދިވެހި ފުލުހުންގެ ޚިދުމަތުން ވިދާޅުވީ، ކޯޓު އަމުރެއްގެ ދަށުން ހ. ރަބީޢީމަންޒިލް، އަބްދުﷲ ޝާހިދު ހައްޔަރުކޮށްފައިވަނީ ރޭ 21:59 ހާއިރު ހުޅުމާލެއިން ކަމަށެވެ. އަދި އޭނާ ދިރިއުޅޭ އެޕާޓްމަންޓް ބަލައި ފާސްކުރުމަށްފަހު، ފުލުހުން ވަނީ އޭނާ ދޫނިދޫ ކަސްޓޯޑިއަލްއަށް ގެންގޮސްފައެވެ.
ފުލުހުން މައުލޫމާތު ދެއްވި ގޮތުގައި، ޝާހިދުގެ މައްޗަށް ތުހުމަތުކުރެވެނީ އުމުރުން 18 އަހަރުން ދަށުގެ ކުޑަކުއްޖަކަށް ޖިންސީ ގޯނާކުރި ކަމުގެ މައްސަލައެކެވެ. މިއަދު އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ތަހުގީގު މަރުހަލާ ފުރިހަމަކުރުމަށްޓަކައި ބަންދުގައި ބަހައްޓަން 30 ދުވަހުގެ މުއްދަތެއް ކޯޓުން ވަނީ ދީފައެވެ.
މި މައްސަލައާ ގުޅިގެން ޝާހިދު ހައްޔަރުކުރުމުގެ ކުރިން އެކްސް ގައި ކުރެއްވި ޕޯސްޓެއްގައި ވިދާޅުވީ، މިއީ އޭނާގެ އަބުރު ކަތިލައި ސިޔާސީ ގޮތުން ދައްކަމުންދާ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށެވެ. އަދި އޭނާގެ ދަރިކަލުން ޔާމީން ޝާހިދު ވެސް ވަނީ އެ ތުހުމަތުތައް ދޮގުކޮށް، މުޅި އާއިލާ އޮތީ ބައްޕަގެ ދިފާއުގައި ސާބިތުކަމާއެކު ކަމަށް ވިދާޅުވެފައެވެ.
ފުލުހުން ވިދާޅުވީ ކުޑަކުދިންނަށް ކުރާ މިފަދަ ޖިންސީ ގޯނާގެ މައްސަލަތަކަކީ ސީރިއަސް މައްސަލަތަކެއްގެ ގޮތުގައި ބަލަމުން އަންނަ މައްސަލަތަކެއް ކަމަށާއި، މި މައްސަލައިގެ ތަހުގީގު އިތުރަށް ފުޅާކޮށް ކުރިއަށްގެންދަމުންދާ ކަމަށެވެ.
