މައިލޯ ރަމަޟާން ކުރިކެޓު ކާނިވަލުގެ އޯޕަން ޓޭޕް ބޯޅަ މުބާރާތުގައި މިއަދު ކުޅުނު މެޗުތަކުން ޓީއެފްޓީ އާއި ފިނޮޅު ކާމިޔާބީ ހޯދައިފިއެވެ. މި މުބާރާތުގެ ފޯރިގަދަ ކުޅުމެއް މިއަދު ފެނިގެން ގޮސްފައިވާއިރު، މިއީ ގްރޫޕް ސްޓޭޖުގެ މުހިންމު މެޗުތަކެކެވެ.
މިއަދުގެ ފުރަތަމަ މެޗުގައި ބައްދަލުކުރީ ޕޮލިސް ކުލަބާއި ފިނޮޅެވެ. މި މެޗު ފިނޮޅުން ކާމިޔާބު ކުރީ 54 ލަނޑުގެ ބޮޑު ތަފާތަކުންނެވެ. ފުރަތަމަ އިނިންގްސްގައި ފިނޮޅުން ކުޅެން އަރައި 8 އޯވަރުގެ ތެރޭގައި 3 ކުޅުންތެރިން ނުބައިވެގެން 128 ލަނޑު ހެދިއެވެ. އެ ޓީމުން އެންމެ ރަނގަޅު ކުޅުމެއް ދެއްކީ 11 ބޯޅައިން 34 ލަނޑު އެއްކުރި މުއާވިޔަތު އަބްދުލް ޢަނީ އެވެ. ޖަވާބުގައި ޕޮލިސް ކުލަބަށް 7.4 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން ހެދުނީ 74 ލަނޑެވެ. އެ ޓީމުން އެންމެ ގިނަ ލަނޑު ހެދީ 6 ބޯޅައިން 18 ލަނޑު ހޯދި އަހުމަދު ޝިރުހާންއެވެ.
ދުވަހުގެ ދެވަނަ މެޗުގައި ޓީއެފްޓީން ވަނީ އެވިއަރ މޯލްޑިވްސްއާ ވާދަކޮށް 8 ވިކެޓުން މެޗު ކާމިޔާބުކޮށްފައެވެ. އެވިއަރ އިން ކުޅެން އަރައި 8 އޯވަރު ހަމަވިއިރު 3 ކުޅުންތެރިން ނުބައިވެގެން ހެދުނީ 91 ލަނޑެވެ. އެ ޓީމުން އެންމެ ރަނގަޅަށް ކުޅުނީ 18 ބޯޅައިން 22 ލަނޑު ހެދި މުހައްމަދު ޝަދުހަމްއެވެ. ޓީއެފްޓީން ޖަވާބުގައި ކުޅެން އަރައި 6.4 އޯވަރުގެ ތެރޭގައި 2 ކުޅުންތެރިން ނުބައިވެގެން 94 ލަނޑު ހަދައި މެޗު ކާމިޔާބުކުރިއެވެ. ޓީއެފްޓީއަށް މެޗު ކާމިޔާބުކޮށްދިނުމުގައި އެންމެ މުހިންމު ދައުރެއް އަދާކުރީ 10 ބޯޅައިން 33 ލަނޑު ހެދި އާދަމް ނާސިފް އެވެ.
މި ނަތީޖާތަކާއެކު މުބާރާތުގެ ގްރޫޕް ބީގެ ތަރުތީބަށް ވަނީ ބޮޑު ބަދަލެއް އައިސްފައެވެ. މިހާތަނަށް ކުޅުނު ތިން މެޗުގެ ތެރެއިން ދެ މެޗުން މޮޅުވެ، ޓީއެފްޓީ، ފިނޮޅު އަދި އެވިއަރ ވަނީ 4 ޕޮއިންޓާއެކު އެއްވަރުވެފައެވެ. ނަމަވެސް، މިހާތަނަށް ޖުމްލަ 14 ވިކެޓު ނަގާފައިވާތީ، ރަން ރޭޓަށް ބަލައި ފިނޮޅު މިވަގުތު އޮތީ ގްރޫޕުގެ އެއްވަނައިގައެވެ. މި ގްރޫޕުގައި ހިމެނޭ ޕޮލިސް ކުލަބަށް އަދި މިހާތަނަށް އެއްވެސް ޕޮއިންޓެއް ލިބިފައެއް ނުވެއެވެ.
