ދުނިޔެއާއި އާޚިރަތް އެދޭނަމަ އަބަދުވެސް ހުންނަންވާނީ މައިންނާއި އަނބިންގެ ކިބައިން މާފަށް އެދިއެދިއެވެ! މިގޮތަށް ބުނުމުން ތިއައިގެ ތެރެއިން ބައަކު ބުނެފާނެއެވެ! އެއީ ކީއްވެގެން ހެއްޔެވެ؟ އަހަރެން އެމީހުންނަކަށް ކުށެއް ނުކުރަމެވެ. މިގެންދަނީ ވަރަށް ރަނގަޅަށް ކަންތައްތައްވެސް ކޮށްދެމުންނެވެ. ދެން އެހެންކަމަށްވާއިރު އަބަދު މާފަށް އެދެންވީ ކީވެގެން ހެއްޔެވެ؟
ރަނގަޅަށް ވިސްނާށެވެ! މައިންގެ ހިތް ހަލާލު ހޯދުމަކީ ކުރަންޖެހޭ ކަމެކެވެ. މައިންގެ ހިތުގައި ޖެއްސުން ފަދަ ކަންކަން ކުރާމީހުންގެ މަރުމަތި ނާމާންވެފައި އެބަހުއްޓެވެ. ކަޅި ހުއްޓި ޝަހާދަތް ނުކީފައިވެސް އެބަހުއްޓެވެ.
ސުވަރުގެ ވަނީ މައިމީހާގެ ފައިތިލަދަށުގައި ކަމަށް ބަޔާން ކުރައްވަވާފައިވާ ޙަދީޘްފުޅުން ނުފުދެނީ ހެއްޔެވެ؟ ދެން ނިކަން ވިސްނައިބަލާށެވެ! "އިންސާނާއަށް، އޭނާގެ މައިން ބަފައިންނަށް. (ހެޔޮކޮށް ހިތުމަށް) ތިމަން ރަސްކަލާނގެ ވަޞިއްޔަތް ކުރެއްވެވީމެވެ. އޭނާގެ މައިމީހާ ބަލި ނިކަމެތި ޙާލުގެ މައްޗަށް، ބަލި ނިކަމެތި ކަމާއެކުމާބަނޑުގައި އޭނާ އުފުލިއެވެ. އަދި އޭނާ ކިރު ތުނބުން ވީއްލުން ވަނީ 2 އަހަރުގައެވެ. (ތިމަން ރަސްކަލާނގެ އަމުރު ކުރެއްވެވީމެވެ.) ތިމަން ރަސްކަލާނގެއަށާއި ތިބާގެ މައިން ބަފައިންނަށް ޝުކުރުކުރާށެވެ! އެނބުރި ރުޖޫޢަވުން ވަނީ ހަމަ ތިމަން ރަސްކަލާނގެ ޙަޟަރަތަށެވެ." އަދިވެސް އަޑުއަހާށެވެ. "އަދި ތިމަން ރަސްކަލާނގެއާއިމެދު، ތިބާއަށް އެނގުމެއް ނުވާ އެއްޗެއް ޝަރީކުކުރުމަށް، އެދެމީހުން ގަދައަޅައިފިނަމަ، ފަހެ ތިބާ އެމީހުންނަށް ކިޔަމަން ނުވާށެވެ! އަދި ދުނިޔޭގައި އެދެ މީހުންނާއިއެކު އުޅޭށެވެ! އަދި ތިމަން ރަސްކަލާނގެ ޙަޟްރަތަށް ކިޔަމަންވެ، ރުޖޫޢަވީ މީހުންގެ މަގަށް ތަބަޢަވާށެވެ! ފަހެ، އެއިރުން ތިއަބައިމީހުން ކޮށް އުޅުނު ޢަމަލުތަކުގެ ޚަބަރު ތިމަން ރަސްކަލާނގެ ތިއަބައިމީހުންނަށް އަންގަވާހުށީމެވެ" މިއީ ލުޤްމާން ސޫރަތުގެ 14 އަދި 15 ވަނަ އާޔަތުގައި ބަޔާންވެގެންވާ ﷲ ތަޢާލާގެ ވަޙީ ބަސްފުޅެވެ.
ނިކަން ވިސްނައިބަލާށެވެ. ﷲ ތަޢާލާއަށް ޝުކުރުވެރިވުމުގެ ފަހަތުން މައިން ބަފައިންނަށް ޝުކުރުކުރަން އަނަގަވާފައި އެވަނީ ކީއްވެގެންހެއްޔެވެ؟ އެކަމުގެ މުހިންމުކަމުގެ ބޮޑުކަން ހަނދާންކޮށް ދިނުމަށް ނޫންހެއްޔެވެ؟ ދެން ފަނަރަ ވަނަ އާޔަތުގައި އަންގަވާފައި އެވަނީ ދުނިޔޭގައި އެދެ މީހުންނާއިއެކު އުޅުމަށެވެ. މުސްކުޅިވީމާ ގެންގޮސް ބައަކާއި ހަވާލުކުރާކަށް ނޫނެއް ނޫން ހެއްޔެވެ؟ މުސްކުޅިވާ ދުވަހު ތިބާގެ ކިބައިގައި ތަނަވަސްކަން ހުރިނަމަ ނޯކަރުން ލައްވައި ބެލި ނަމަވެސް ހުރިހާ ކަމެއްވެސް ކުރަންވާނީ ތިބާގެ ބެލުމުގެދަށުންނެވެ. ތިބާގެ އަޅައިލުން ދޭންވާނެއެވެ. އަތުގެ ފިރުމުން ހުއްޓައިނުލާށެވެ.
ކަންކަން މިމަގުން ހުރުމުން ގިނަގިނައިން މައިން ބަފައިންގެ ކިބައިން މަޢާފަށް އެދި ހިތް ހަލާލު ހޯދަންވާނެއެވެ.
އަނބިމީހާގެ ކިބައިން މަޢާފަށް އެދުމުގެ ވާހަކައިން ފެށީ ވަރަށް މަތިވެރި މަޤްޞަދެއްގައެވެ. ތަޖުރިބާ ކޮށްލަން ނަމަވެސް ނިކަން އަނބިމީހާގެ ކިބައިން މާފަށް އެދެން ފަށައިބަލާށެވެ! އަނބިމީހާގެ ކިބައިން ލިބޭ ލޯބި އިތުރުވެގެންދާނެއެވެ. އަޅައިލުމާއި އޯގާތެރިކަން އިތުރުވެގެންދާނެއެވެ. ނަތީޖާއެއްގެ ގޮތުން އާއިލީ މައްސަލަތައް ނެތިގެންދާނެއެވެ. ދެމަފިރިންގެ ގުޅުން އިތުރަށް ބަދަހިވެގެންދާނެ އެވެ. ލޯތްބާއި ކުލުނު އިތުރުވެގެންދާނެއެވެ. އިތުބާރުވެސް އެތައް ގުނައަކުން ބޮޑުވާނެއެވެ.
އެއްވެސް ޙާލެއްގައި މިބުނަނީ އަބަދު މާފަށް އެދިއެދި ހުންނަވާހަކައެއް ނޫނެވެ. އެކަމުގެ ވަގުތުތަކުގައި އެކަން ކުރުމުގެ ވާހަކައެވެ. ކިތަންމެ ގިނައިން މަޢާފަށް އެދެން ޖެހުނު ނަމަވެސް އެކަން ކުރަން ފަސް ނުޖެހުމުގެ މުހިންމު ކަމުގެ ވާހަކައެވެ.
- އިސްލޤމީ ތިލަފަތުގެ ދަރުސަކުން
